ياحمام الورق غرّد على خضر الغصون = لأجل اجاوبك الفرايد واجرّ ألحانها
الغصون اليابسه ماتهيّض لك شجون = ماتهيض الا على اللي جذبك ألونها
يوم أنا لي هاجسٍ مايغنيلك بدون ... = مايهيض وينجبر قلبي بسلطانها
القصيده بيت مبناه من عدة ركون = صوغ معناها قبل ( قافها واوزانها )
وإن مدحت !! امدح رجالٍ عليها يتعبون = ما حفظ طوب المباني سوا سيسانها
في زمن من ( يمْدح أكثر من اللي يمدحُون ) = صارت ونعمين عند العرب بألسانها
النعم ماهي بكلمه على ماتشتهون = ماتقال الا على اللي طوال أيمانها
لجلها كم يتعبون الرجال يخسرون = مايحسبون الخساير بقدر أثمانها
الخساره كان تبغى الصراحه وش تكون ؟؟ = مدحتك لأشخاص لامن بحثنا شانها !
( يامدوّر مصلحه ) ( يا عليها يدفعون ) = فالنهايه شربةٍ ماروت عطشانها
وأنت أبو زابن وللمرجله راس وزبون = مهرةٍ من طيب راسك بيدك عنانها
ماهو بهرجٍ طرالي ولا مبنى ضنون = لا تردون العلوم ! ان غدا برهانها
ذاك منور ( لو عليك الاسامي يكثرون ) = جلّ من يفرق عباده ويعلي شانها
يشهد الله والرجال بكلامي يشهدون = تفتخر فيه القبيله وضمن أعيانها
من عيال جويبر اللي ( لا قالوا يفعلون ) = قبل تهرج ! توزن الكلمه بميزانها
الرساله من ضميري نقلها التيلفون = وصلوها يم ابو زابن بعنوانها