مادريت ان الهوى يخلف العقل السليم=لين جربته وذقت المرارة والحلا
اشهد اني كنت في مبتدى الرحلة غشيم=رحلةٍ خلتني اضيع في وسط الخلا
اتصبّر واتجبّر واقول الله كريم=واتناسى واتسلى وقلبي ماسلا
عادة المغرم غرامه معلق فالغريم=لعنبوا من لامني في غرامه ياملا
واحدٍ ماشفت مثله يجيبن الحريم=كمّله ربي وفي كل شيء امكملا
لاوقف ماياقف الا بوضعٍ مستقيم=وان جلس جلسة ملك يطلب الشعب الولا
وان مشى شد انتباه المغفل والحكيم=من ثقل ممشاه كن المكان مزلزلا
ويش اوصف ويش اخلي من الشيء العظيم=ما بغيت اجيب لي وصف فيه مقولا
لاطرالي قام يدفعني ابليس الرجيم=التفت في ذكريات المودة والغلا
آه ياوقتٍ مضى وآه يالحب القديم=وآه ياقلبٍ من الحب و الشوق امتلا
ياحسافة ضاع حلمي على راي الحليم=واستصبت وصابني عقب فرقاه البلا
اقفت ضعونه وانا اخذت ضربة فالصميم=لكن المكتوب يامرحبا به ياهلا
راح والذكرى كما النار والخاطر هشيم=كل ماشبت طلبت الولي جل وعلا
يلطف بحالي ويرفى لي الجرح الالئيم=ويرحم اللي تحت ظغط الظروف مكبلا