تبي مسك المنيحه والمنيحه ديسها محلوب ( صياف ورشيد ) 1399 هـ
 

أقدم لكم هذه المحاورة الشيقة والقوية كعادة لقاءات صياف ورشيد التي تتسم بالعنف والقوة ,,

http://www.youtube.com/watch?v=rdLHjTCYgac

صياف
سلام الله على العراف ردة ضوها مشـــبوب=تعيّد للرجال اهل المعرفة قبل الاعيـــــــــــادي
انا اشوف الزلامي قام يقصر في زرار الثوب= وقام يحد سيل طويق بين الضــــــلع والوادي

الزلامي
هلا يامرحبا ترحيبة يكمل بها الماجـــوب=وندعي لك بعدها بالهداية والله الهـــــــــــــــادي
ليا علمت عني من يحـــــط العلم بالمقلوب=اشيلك من حضين امك واحط عزيز البــــــادي

صياف
نبي نحفر هذاك البير لين نصفّي المشروب=أظن الاجودي يدله وينسى بنت الاجـــــــوادي
تبي مسك المنيحه والمنيحه ديسها محلوب=يشوتك دونها المجنون شوتة كورة النــــــــادي

الزلامي
أهل جده يحفرون الحفر واحسابهم محسوب=ترى سيف الشجاعة مايحده كل حــــــــدادي
بغيت احييك ياصياف واحيي جدك المحبوب=واثر جدك غدى في نجد وانته فالذهب غادي

صياف
عليك الهون لاتنقز عليه حدك المنصــــوب=انا من زين طبعي مانســـــيت الملح والزادي
يبا يحييني الله يا اشهب الجنحان والعرقوب=ومن ينزل على شط البحر ماعنه نشـــــادي

الزلامي
نبرّك مار ماتنفع بريرة في قلوب احــــروب=بلشنا بك وعودنا معك في حرب واجـهـــادي
ابوكم مايقصر مار بعض اخوانكم منكـــــوب=يطالع صورته فالماء وراح يصيح وينــادي

صياف
ليا طال النهار يخلص الطالب مـــن المطلوب=لكن انته علامك عن هذاك الدرب متحـادي
نشب الانار فوق الثلج خمس ايام لين يـــذوب=وتبلش لك بطير مايصيده كل صـيـــــــادي

الزلامي
أظن اليوم مع طول النسم جالك ظهر واجنوب=تحب اتصير الاول ما نت لاعاشر ولاحادي
فلوس الهند ربّيه لكـــــــــــــن اجنيبها مربوب=وسعر النقد ثابت لانقص ســـــعره ولازادي

صياف
يبا يكثر عليك الذنب لو انك قليـــــــــل اذنوب=وتطلب شربة الماء الصافية من كل ورّادي
تبا تقرا الكتاب اللي بحبر اقلامنا مكــــــــتوب=وتلقا فيه صورة سيف من عنتر وشــــدادي

الزلامي
ليا سكـــــــرت عنا درب نلقا من وراه ادروب=ونكشف ماوراكم ياهل الركضة والاسنادي
تبا تركض وتتعب ثم يطيح اعقالك المعصـوب=وتنظرنجم يطلع لين نور الصبـــح ينقادي

وسلامتكم

يالله على المحاوره طعم غير
الله يرحم صياااااااف
ويطول في عمر ابو جميل


شكرا ناصر التميمي

العفو يا تركي ,,

آمين الله يرحم ابو مفلح ويطول عمر ابو جميل ,,

الله يعطيك العافية يالتميمي على ماتقدمه للمنتدى من درر محاورات الزمن الجميل

محاورة استمتعت بقراءتها

وننتظر مشاركاتك القادمه

بارك الله فيكم وجزاكم الله خيررر

وشكرا لك اخي الذيابي على التصحيح والافادة

وهذه المحاورة اقوى بكثير من محاورة خصمكم في الاخره عبدالله المسعودي ..

نبرّك مار ماتنفع بريرة في قلوب احــــروب
بلشنا بك وعودنا معك في حرب واجـهـــادي


الله الله


لاهنت ياناصر

اشكرك على نقل هذه المحاوره الجميله