السلام عليكم ورحمة الله وبركاتة
الله يسعد أوقاتكم بكل خير
هذه أول مشاركة لي بهذا المنتدى الرائع قصيدة تعبر عن نفسها


سـلـط عـلى الجـوال في بعض الاحيـان **** مثل الـردي اللي يـخـلي خـويـــه
ليا بغيته وأ نت محـرج وعــــجــلا ن **** بارضن خلا في سهله جـرهديــــــه
يطـلـع عـلى الشـاشه تعـذر وخـــذلان **** ينبيك عن وضع الـبروج الرديــــه
وأعـوذ بالـرحــمـن من كــل شـيطـان **** والـمـوقف اللي مثل ســيف المنيه
بين الظــما والجـوع والذيب سرحـان **** يـوم الـمـصـيـبـه حـولـت بالمطــيه
بعـض المواقــف ماتصـور بالاذهــان **** امقــدره باقــــدار رب الـبـريــــــــه
لاهـاتـف يرسـل ولا حــس عـربــــان **** غـيـر الـخـــلا يدوي عـليه دويــــه
والجـيـب جــاثم في محـله وعـطــلان **** والجـــو حــامي ويـتـزايـد لــظــيـه
وقـفـت لا قــوه ولا حـيــل حـيـــــران **** مـسـتـسـلـمـا لـظــروفـي الـعنجهيه
ماهــو خـيـال يـنسـجه حس فنــــــان **** هــذا الصـحـيـح وقـصــتي واقـعـيه
لـولا الرجــا بالله وســلاح الايـمــــان **** كــان أنـصـدم وانـهـارت الـمـعنويه
والله فـزعـلـي في ريـاجـيل عتبـــــان **** يــدورون الـصـيـد بـارضن خـلـيـه
قـالـو وش الي صـارلك قـلـت بلـشان **** والـجـهـد غـلـق مـا بـقـا لــه بقـيه
قالـو لي أبشر بالسعد والـفـرج حـان **** شـفـت الـوفــا بـوجــيـهم والحميه
فيهم على الفزعه ضرم راس ظرمان **** يـازيـن فــزعــات الرجــال الـوفـيه
وعلى يـديـهـم هــان ما كـان صعبــان **** تـبـدلــت ظـيـقــات وقـتـي سـعـــيه
عتيبه الهــــيلا على مـــــــر الازمان **** في وقـتـنـا الـحــاضــر وبالـجاهليه
رجالهم دايــم على الطـيـب شـفــــقان **** لــطــامـت الـعـايــل هــل الشاذليه
من دون قـاصـر بالـقـبـايل ونقصان **** قــدام لا تــكــتــب عــلـيـه خـطــيه
الـخـيـر بالاجـواد في كــل الاوطــــان **** أنا أعــرف الـلـي لـي واللي عـلـيه
الطيب جـمـن يــارده كــل عــطـشان **** ولا تــاصـلـه غـير الـحـبال الرهـيه
عـبـرت عـن مـاصار من قلب ولسان **** بـحـروف شـعـر مـنـتـقـيـهـا نقيـه
ما يـجـحـد المـعـروف ياكـود جـابـان **** والا الـلـئـيـم اللي عـلومه خزيـه
الـيـا شرى خسران وانباع خـسران **** لا جـايـبن حــسـنـه ولا زال سـيـه
ما يـنـحـسـب له بالمـيـادين حـسـبان **** لا جـايـبــن هـــــاذي ولا زال ذيـــه




الشاعر / سالم بن صويلح الحربي