قصيدة لشاعر عبدالله العصيمي
 

الدمعه اللي حدرت في ضحى العيد
_________ خنقتـهـا.. خنقتـهـا.. واخنقتـنـي

ثم فيضت واسقت قفـار جراهيـد
_________ لكنهـا تحـت المدامـع كوتـنـي

والحقتهـا ونـه وحنـه وتنهـيـد
_________ وضربت صدري من كثر مابلتنـي

كثـروا علـي مدوريـن المناقيـد
_________ نـاس تـدور زلتـي واشتمتـنـي

لو ان بعض الهرج مثل العباريـد
_________ قدمه صخر لو صابنـي مانحتنـي

والهرجه اللي جات من زيد وعبيد
_________ طمرتهـا طنخـه ولا عذربتـنـي

اكحـل العـذال واكـيـد للكـيـد
_________ واقدح بزنـدي واتعصـى بمتنـي

ناسٍ تقول العشق ماظـن بـه فيـد
_________ وكلن على همـه وشوفـه نعتنـي

ماذاقوا اللي ذقت من شـرد الغيـد
_________ سكـرات حـب وعلـةٍ طاولتنـي

لاني عشقت من الظبى قايد الصيد
_________ عنقاً سبت كل الغـلا ثـم سبتنـي

مدعوجة العينيـن منتوقـة الجيـد
_________ اللـي تمنـى فرحتـي واهبلتنـي

لاجيت اعلمها من الشعـر وازيـد
_________ ثم اهمست واغضت بعيـنٍ بلتنـي

تقول يفدونـك جميـع القواصيـد
_________ واقول انا فـدوة عيـون اهبلتنـي

واليوم دون القرب حل التصاديـد
_________ ويش السبب واللي هوتني جفتنـي

العيـد راح وخلـد الهـم تخليـد
_________ من يومهـا غابـت ولا وادعتنـي

كانـت تقـول ايامنـا كلهـا عيـد
_________ واليـوم زل العيـد مـا عايدتنـي

صح لسان الشاعر عبدالله العصيمي
لاهنت على النقل

صح لساان الشاعر الرائع / عبدالله العصيمي



ولاهنت يالغالي على النقل المميز ..



تحيتي
..