سلام ياللي حل مشكلـــة القبيلــــة بالســــلام=الله يعــين اللــي سعــى بالصلـــح واللي حلها
عسى جزاه بجــــنة الفردوس مــن رب الأنـــــام=في ساعة يجمــع بهــا الله الخــلايق كلــــها
يا صالح الله يصلح امرك في البداية والختام=حليت مشكله يا بو مسفر صعب حلـــــــــها
أطفيت نار الفتنة اللي ولعت مـن قـــبل عـــــام=أجر وصِلت رحمٍ كثير الناس ما يفطن لها
الامر صعب وهونه ربٍ حمــى البيـــت الحـرام=للي يدل الناس للطاعـــة ونــاس يضلــــــــها
ولمن بدى في صلحهم منـــي جـــزيل الاحــــترام=روس الرجال اللي يضلل في المواقف ضلـها
وردو على هداج تيما مروي الضمي الحيــــــام=قالــوا قضيتنا بيـــد صالح وعنــــده حلـــها
قاموا بماجوب القبيلة حـــي والله من مقــــــــام=وهوه تنازل ما حســـب دق الامــــور وجلـــــها
ما قال أبي فيها عوض من عند غير الله حرام=الطَيِّبـــة كسبٍ لبـو مسفـــر وهــو قــدٍ لـها
عفى عن المذنوب قبل الحــد فوقــــــه لا يقــــام=بِـدَو وجيــه الخير فـــيها والله اللـــي حلـــها
تركي بجاد وبدر وصنيتان والربع الحشــــام=واللـــي من أعيان القبيلة ساهمو في حلــها
هم مقدم العضيان أهــل عمهـوج عالــين المقــــــــام=ولا ني بكاذب لو اقول اشيوخ مزحم كلها
وش قال برغش بالسيوف اللي يقصن العظام=شهـــد بها يـــوم ان مـارق بالمعـــارك سلـــها
اللي يبيـــع الــروح بالوقفات بيــــعٍ مــا يســــــام=كم راس شيــــخٍ نزلــه عن مهرته واحتلها
أما بشلفن ضربها يفري الثنادي فـــري خـــام=والا بعمهـــــوج اللي لـــروس الطوال يذلــها
الا من جا عج الرمك في المعركة مثل العسام=افعالهم كبـــدٍ تداويـــها وكبـــــدٍ تعلـــــها
قبيلــة بين القبايــــل يستحقــــــــــــون الوســـــام=المعضـــلات تشيلـــها والكايـــدات تحلــها
من الصفات الطيبة حازو على مـــثل الســـنام=العرف فيها والشجاعة والكرم طبعٍ لـها
دخيلهم عده براس طويــق يكــرم مـا يهـــــان=مقدر ومحشوم واخصامـــه تمــوت بغلـــها
لجا نهارٍ فيه تدعى أهل الفعايــــل بالاســـــام=سواقــت العطفـه وعقــاد الحـــبال يحلــها
مخضبات حدب السيوف اللي يقصن العظام=اسيوفهم تعـرف بسامـيها وهـم كفوٍ لـها
تاريخهم واضح مثل نور القمر يجلي الظلام=اخـص فيــها الضيط واعــم القبيلة كلها