يا بدر بن مشعان مذكور بالخير =كم واحدٍ حاضر و هو في غيابه
طاريك حاضر يا زبون المخاسير =و ليا حضر طاريك يا مرحبابه
غالي و لك صيت و معزه و تقدير=تدري و أنا أدري به و غيري درى به
سطرت تاريخك بالامجاد تسطير = فيه المعزه و الفخر والمهابه
ينصاك فنجال الدلال المباهير = قبلك على غيرك حرامٍ شرابه
ما أقول في باق الرياجيل تقصير =نبقى ربع و عيال عم و قرابه
لكنّ هذا بدر يفرق عن الغير = ضميره أنظف من غشين السحابه
عز الخوي و الجار ريف المسايير =ما صك دون الضيف بالقفل بابه
دون الدراهم ما يصكّ الازارير =يكرم بما يملك و يلقى ثوابه
من الترم الاول معه للترم الاخير =دايم خوي الجنب يحسب حسابه
زودٍ على حسن الادب حسن تعبير = يبهج صناديق الضماير جوابه
إمكانفه لاحق و فواز و منير = و السيف قوة ضربته من نصابه
مشهور من روس الرجال المشاهير =الله على التقوى يطوّل شبابه
قدره كبير و عندي أكبر من النير = دمث الجناب اللي عزيزٍ جنابه
طبعت له من واقع الفعل تقرير =يوم الزمن راجعت صفحة كتابه
قلت الحقيقه وأنت يا بندر بدير =بلّغ تحياتي بدر بالنيابه