دقيت سلف الموتر اللي محتزي زيته وماه=وعزمت أعنه مثل عن الخيل مع دربٍ طويل
وسقته بليلٍ بارد الأجواء بعد حره غشاه=لعل طول الدرب يقصر لجل توجيب الجميل
من ديرتي شديت حيله واستعنت الله علاه=وحذفت نقطة منطلق مشواري بشرقٍ عليل
وحطيت غرب المملكه قدام عيني بانتباه=والمعرفه عند الرجال اتجاره وكنزٍ جليل
من بعد في دربي تعديت القاعيه مع غثاه=وعفيف طبيته عجل وأنا على داره ثقيل
وسهجت مابعده وأنا عيني على ظلم وحصاه=حتى تعديته قبل صبحٍ نميل ولا يميل
ومشيت فالخط السريع اللي يشوق اللي مشاه=وأنا بعد جيته كما اللي جا لحماي الدخيل
وقطعت مشواري بدون إرهاق لحدود السراه=يوم المحبه والوفاء وقود جسمي والحصيل
أبغى محل اللي علشانه تساهلت العناه=الشاعر اللي للثريا ناف بالشعر الجزيل
وأصبحت فالطائف بعد ليلٍ مثيلي ماسراه=وريحت قلب الموتر اللي فرصته وقت المقيل
وجهزت للشاعر مشاعر شاعرٍ علمه حماه=ماهوب في حاجة لبرهان المحبه بالدليل
لك يانبيه أسوقها سوق ابدويٍ في فلاه=للذود عقب أوعد خضاره يوم غذاه المسيل
مضمونها مبروك جعل أفراحكم طول الحياه=والله يتمم بينكم خيرا" ولاغيره بديل

المشاركة الأصلية كتبت بواسطة طارق النفيعي (المشاركة 1092930) الله الله صح لسانك ملايين يابو غازي ويستاهل الشاعر نبيه السريح والف مبروك له الزواج مبدع و جزل و وافي كـ عادتك ..

المشاركة الأصلية كتبت بواسطة عناد الروقي (المشاركة 1092934) الله الله جزله من رآس جزل صح اللســـآنك وأعتلا شــآنك ونبيه يستــآهل ومبروك زواجه أنشــآء الله ولاهنت ع الإدرآآآج هنـــآ