الزمان يمرّ والوقت يقسى ما يلين = والليالي تبحث من الرجال الخافيات
البليد اللي ما يفهم من دروس السنين = والفطين اللي حفظها وخلاها وصات
وان بغيت الصدق فالله على الدنيا يعين = والله انه يحسن الخاتمه عند الممات
ساعة ما عاد فيها يسار ولا يمين = ساعة تصغر بعينك طموحات الحياة
اللهم ارحم ضعيف تفاجأ باليقين = يا كريم تجزي الحسنه بعشر حسنات
انت غفّار الخطايا وربّ العالمين = وأنت قيّوم الأراضي وسبع السماوات
مغفرتك وعونك ارجي ولا غيرك معين = وتوبة تمحى وتدمح جميع السّيّئات
الصداقه كنز .. والكنز في سوقه ثمين = فزعة لا صرت ادوّر على طوق النجاة
وين ابلقى لي رفيق على دنيا ودين = حافظ دينه وطيبه صفه ضمن الصفات
سلعة تندر لا نادو بسوق الرابحين = سعد ابو رجل وجدها وفاز بها وبات
والله اني طامع في مخاوى الطيبين = يوم غيري شاب راسه على حبّ البنات
الرخا خلاّنه اكثر من دموع الحنين = وضعهم ما بين تطبيل ولاّ مجاملات
غير لا انحدّيت والماء طفح فوق الطّحين = وحضبتك المدلهمّات من كلّ الجهات
تعرف من قام يصهل وشدّ المنكبين = وتعرف من خشّ راسه وسط كمّ العبات
من بنا صرح الصّداقه على ساس متين = والله انه ما يهم الرّياح العاتيات
وأما انا ماني بأساير خبيث الوالدين = اتجنّب طرقته هو وقطّاع الصلاة
من تردّا في قريبه وفالحصن الحصين = ما هو بغانم ولا فايد لو راس شات
أبرك من مجالس النّذل مقصور اليدين = واستلام اعراض .. واعلوم ما فيها طراة
اتدارس صفحة من رياض الصالحين = وسجدة لله والباقيات الصالحات !