ياليل وش معجلك ريض شويه = خل الخلايق تهتني لذة النوم
وش معنى ساعاتك منول ونيه = البارح ارقد عشر مرات واقوم
ياكم و ياكم طال وقتك عليه = بحياتي ماشفتك عجل مثلك اليوم
يا ليل خابر منته الا بفيه = تطلع عليك الشمس وتصير معدوم
ودك تشوف الشمس والشمس حيه = لكن ما تقدر هذه شي مقسوم
يا ليل عندي شي ما شفت زيه = ان كان فاتك فأنت لا شك محروم
الحين بنت الشمس تحضر هنيه = نجمه ولكن لابسه فوقها هدوم
النور نور الشمس يجهرك ضيه = اتبعثر اخيوطك وينسج لك غيوم
وعاهدك لعطيك منها هديه = من روس اظافرها لسوي لك انجوم
ان شفتها لا تخاف هذي بنيه = ولا تامن وتقعد لنا دايم الدوم