هلا مرحبا ترحيب ما هو بمكبور=عن اعيال عمٍ حاشت الطيب يدها
يقولون ما فالدار شعار وبحور=بعد راح سيف المعرفه من بلدها

نجازيك بالترحيب مع طلعت النور=هذا الأوله يا صاحبي وش بعدها
حبيب وعوض الله وفيصل ومستور=عساها ترد الميته من لحدها

أنا اشوف لي شعار سكبه وحنجور=والأبيات تشبه لــ السوالف سردها
ليا صرت ما تدري عن السر ما جور=عسى العين تسلم يا ولد من رمدها

أنا داري أنك يا أبيض الوجه مقهور=إذا معك خطه ليش ما تعتمدها
لقينا على الشجره ثلاثين عصفور=وقمريةٍ فالغصن تطعم ولدها

أنا خابرك شاعر من اسنين مخبور=تجيك السوالف كلها في وعدها
تجيب الك بيتٍ يا بن عتقان مشهور=ولا ظنتي بعده يذعذع سعدها

أنا ما غدالي شيء لو كبر الأظفور=وكلمتك تلقا فالعرب من نقدها
حسيبي عليك الله يا شاهد الزور=وما في صدور اصحابي امر وادها

غدا لك مع الشعار عامين وشهور=وأنا اظن بين الناس من هو شهدها

أنا ليا شفت أبن عتقان بين الصفوف=ما باقي إلا اقتله وارميه فالمقبره
اللي منول ما هو معروف صار معروف=لو كان ما عنده الا الهرج والبربره

الحمد لله يوم انك عما ما تشوف=ما تقدر تميز الفرجال والمسطره
اما نحرنا الجمل والا ذبحنا الخروف=والا طرحنا لكم يأهل العطيف بقره

والله لالانا رجال ولا نهين الضيوف=إني لسنعك بالسكين فالمجزره
حنا عتيبه رجالاً ينقلون السيوف=وإلا أنت ما عندك إلا الصوت والحنجره

أنت تسولف كثير وخوف ما منك خوف=واللي سواتك على الجلسه نبا نعذره
أنتم عتيبه نعم لكن صارت ظروف=مدري تعيشون فأم الدوم وإلا انقره

حنا نخاوا الرجال ولا نخاوا الضعوف=يوم أنت قسمك ما عنا مثل قسم المره
دور وأسامي عتيبه ثابته فالكشوف=فازوا هل الميمنه خسروا هل الميسره

ما دام هذا كلامك وا حسوفي حسوف=أثره معذور يوم يحوسك المنقره
وارد عراوي بلاها فالسست والبلوف=وأن وزنت ابلوفها يبغا لها سمكره

يا اللي تباها تطوف انا معك ما تطوف=هذا العما واغلب الشعار ما يقدره
الصاحب اللي ما يعرف لنقط والحروف=اقول يا مقشره واقول يا مقشره

الشاعر اللي كلامه ما يجيب معروف=شيءٍ طبيعي عيال اسليم تستحقره
حنا ترانا من البارح خطبنا الهنوف=جبنا لها خاتمين اجداد مع بنجره

تسمعوا يا الجلوس وميزوا يا الوقوف=نويت اعصره كما الليمون فالمعصره
البنت ما تقبل اللي يصفقون الكفوف=ادور اللي يجيب الطيب والمجمره

يا ذيب يا اللي تحوف الناس وشبك تحوف=ترا طريق الخطوره صعب ما تعبره
لو أن تمر المدينه مثل تمر الهفوف=يمكن يصدر عليها سعر ما تقدره

حنا نجيب الطماعه من ميات الولوف=وأنته ليا رحت منت محصل الجوهره
الظاهر أن التعب ما هو بمعك مخلوف=يا اللي من الموت نفسك وصلت الغرغره

يا سرعهم بأمهات الخمس وسط الزروف=راحوا ثلاثين واحد مير جاك اعشره
أن جيت ابي قربهم روحي عليهم عيوف=اوجيههم بارده واعظام متكسره

ترا رجال الأشده ما يبون الردوف=وأنت ومعك ناس ما يطلع من السيطره
لو في يدي راي من شعر القصيد محذوف=تصلح تفك اكفره تصلح تشيل اكقره

أنته تدور شدادك والشداد مخطوف=ليت الذيابي ستر وجهه عن المنظره