يالله منزل تبارك والأعراف=يامرسلٍ موسى بعد غادر شعيب
يالله تنادي بالفرج لابن زنعاف=وجميع من في ضيق ياحي يامجيب
شفنا الجفاء والظلم من ضمن من شاف=أهل المكايد يلحقون المشاهيب
راع الخزايا الفادحه زاد الاجحاف=إجحاف من لاخاف رادع وتعقيب
احلى تحلّي بالعداله والإنصاف=والصدق والإخلاص قدم المعازيب
وإلى سئل عن حاجةٍ هز الاكتاف=تمويه والا فيه سبع العذاريب
يكذب ولايخجل ويظلم ولاخاف=يلعب على الوجهين ضمن اللواعيب
لعبه كبيره شايكه صعب تنطاف=ندفع ثمنها غد والعاقل يشيب
لأمعنت في سود النوايا والأهداف=يغمى عليك ويحضر العقل ويغيب
نعم المظاهر والملابس والأطراف=وقلوب واسرار النوايا غرابيب
لو تختلف مع واحدٍ عده خلاف=واصبح مجمّع له مكايد واكاذيب
يحذف وفي صفه ثمانين حذاف=واكيد حذّاف القفا حذفه يصيب
والكيد زاد أضعاف وأضعاف الأضعاف=بين انتقام وحقد غامض وتأنيب
ينشاف شيء وشيء ماهو بينشاف=بأدق واحكم مبهمات الاساليب
منهج عصاباتٍ على ماض الاسلاف=متوارثين الحقد والشك والريب
أذناب ولها أذناب من بعض الاصناف=يستعبدون الناس صفر العراقيب
ماللنواه الفاسده غير الاتلاف=واعدام راس الشاه لاتهلك الذيب
وان كان مابه عن هل الكيد محراف=نصبر وناخذها دروس وتجاريب
دام الحمول الباهظه راحت خفاف=واهل الوراء عدّوا طويل المراقيب
واهل الصفوف الأوّله صاروا خلاف=وش دور عصمان الشوارب هل الطيب
خل الغنم تختال في سوق الاعلاف=سبحان من يعلم ماأحد يعلم الغيب
والعز في ماقف ماهو بأي ميقاف=لامجامله لاواسطه عدل وصعيب
تخفض به اطيافٍ وترفع به أطياف=يازين هاك اليوم لو انه مهيب
يومٍ ينسّينا جفاء وقتنا الجاف=برعاية الرب الصمد عالم الغيب
وصلاة ربي عد من حج وإطّاف=على الرسول المصطفى معدن الطيب