الغياب المر قتّال الحضور=والحضور العذب قتّال الغياب
الحضور العذب ناتج عن سرور=والغياب المر ناتج عن عذاب
بين ذيك وذيك يختال الشعور=يقتل الاحلام في عمر الشباب
هكذا الأيام والدنيا تدور=نطرد الاحلام والواقع سراب
بين غابات الذيابه والنمور=مايعيش الا النموره والذياب
ليش حنى مانبادر بالظهور=ونتقدم للمعالي مانهاب
دام مكنون الطموح يشع نور=ليش حنى ندفنه تحت التراب!
والله ان الصبر في بعض الامور=يثني الإنسان عن حث الركاب
يازمن نبغى لنا رخضة عبور= تنهي الحيره وتفتح كل باب
للفضا للأرض حتى للبحور=للسؤال اللي غدى ماله جواب
آه ياكثر المصايب والكسور=تنتقل بين المشاعر والرقاب
مايخبي جرحها غير القبور=لين تطوى كل صفحات الكتاب
هكذا وتروح ياغيض الصدور=لا جدال ولا عناد ولا عتاب
مختصرها واقع الوقت الدبور= مايسامح من رضي بالإنسحاب
والحياه اللي تكون بدون دور=تبتدي وتروح مرواح الضباب
والحياه بفعل تبقى للعصور=مثل ماتبقى على الأرض الهضاب
في حظور الفكر وغياب الغرور=نطلق الهمه وتوصل للسحاب
واللبيب اليا تمعن في السطور=يعرف الحكمه ومضمون الخطاب

آه يــاكـــثـــر الــمــصــايــب والـــكـــســـور تـنـتــقــل بـــيـــن الـمـشــاعــر والـــرقــــاب