مرحبا ترحيبت(ن) سـقتها يم الكرام = بالرجال أهل الكرم يوم شبت نارها
ابن عاقل بعد رد التحية باحتـــرام=ليته يجيب العلوم لديار(ن) زارها

البقاء بك يالمرحب على سلم ونظام= عند قومٍ فالمواقف طوال اشبارها
قبل مردود السواليف ياذرب المقام=ويش وسم الناقه اللي تشيل حوارها

يا العتيبي وضعنا ما يبا نصب الخيــام =ما خبرت الناس يا شيخ تحذف جارها
ليتك تخلي عباة الكبر وقت الصــيام=جعل دار الكفــر للحرق معها بــارها

ياسلام ياسلام

صحت الالسن

ممتعين استمروا

كان تبغى الحق والحق حلال الخصام=كل لحيه يالسنافي لها مقدارها
ما يدس الراس فالرمل ياكود النعام=عن طويلات السوالف تسد قصارها

ابن عاقل لو يعرف الحلال من الحــرام=كان مايتبع هل الغـي بعــــد افكـارهــا
خوة اهل الخير يا صاحبي خوة ســلام=والطيور اشكال محدن يعرف اسرارها

كان يارجال في خاطرك بعض الكلام=لا تروح ايمينها لا تروح ايسارها
ياسراب اللال واسمك على وصفك تمام=دونك عيون النشاما تضيع انظارها

الذلول اللي عليها من المقفي سنام=جعلها يا صاحبي تفركك من زارها
المكارم و الشيم والحشيمه للحشام=والخنا لاهل الخنا زارها في دارها