يا اصفر عفيف الي سكن جنبكم وين = الي الى جيت البلد ما اتعداه
يا اصفر عفيف الله يحدك على الشين = وراك ماتبكي قصيرك وتنعاه
وراك ماتبكي عزيز العزيزين = رجل الرجال الي حميده سجاياه
ليته بعيد الدار لو كان بالصين = وليته مع الحيين حتى اترجاه
وليتني اشوفه حلم والناس نايمين = واعلمه بأسرار قلب تمناه
وليته حضر معنا فرحنا على الزين = الي الى جتنا المواقف ذكرناه
ابا اذكرك يا سعود حين بعد حين = ما دام نفسي في جسدها معافاه
وبذكره ياعمير* لو كان مبطين = الى شفت قصره كن عيني تحلاه
كني بصوته له رنين بالاذنين = وايضا اتخيل في خياله وحلياه
بس اتصور صورته داخل العين = ماتمحي الصورة وطلعة محياه
ماينسى مثله عشير الكريمين = الي على وضح النقى دوم ممشاه
ولنا رجاء معقود في شخص الاثنين = محسن وفيصل* والدروب المسواه
يجون مثله ماتجيه الشياطين = على النقى والطيب مشيه ومبداه
الله يغفر زلته قولو امين = وفي جنة الفردوس روحه وماواه