الهيـــــــــــــلا   *** منتدى قبيلة عتيبة

الهيـــــــــــــلا *** منتدى قبيلة عتيبة (http://www.otaibah.net/m/index.php)
-   شعراء قبيلة عتيبة (http://www.otaibah.net/m/forumdisplay.php?f=46)
-   -   شاعر عتيبة (http://www.otaibah.net/m/showthread.php?t=111387)

نجم شامي 28-Jun-2010 02:10 PM

شاعر عتيبة
 
قصيده غزليه رائع لشاعر عتيبة الكبيرعبدالمعين بن عقل الثعلي

يابدير عان بيوتهم طوّيني = ودريول الموتر وصلهم يهدّيه
ومرحانهم فيها القماري تونّي = تلعب عواصيف الهبايب بذاريه
عاينتهم لين الضعون ابعدنّي = تنطّحوا مطلع سهيل ومباديه
على الفروت الحمر يوم اسرحنّي = هافات نافات ٍ على البعد تدنيه
وظلّيت أمد الشوف مع دربهنّي = مقف ٍ غباره والنسيم متقفيه
فرت ٍ حمر ودريول الفرت فنّي = يامال هجران النيا وين يمديه
ياصاحبي عنّي خطاه انتحنّي = ماني براج أنّه يجيني ولا أجيه
أكابد العبرات لين إغصبنّي = رغم على بيّن ضميري وخافيه
وروابع بين الضلوع أزعجنّي = هذي تجيني به والاخرى تودّيه
هات الدلال وهاتلي نجرهنّي = وإشعم شعام الضو وإرم الحطب فيه
والله لالا كيف ٍ ونجر ٍ يدنّي = كيف ٍ على مالاق بالي مسوّيه
يبرد لواهيب الهواجيس عنّي = لاضاق صدري قلت قم له وعطنيه
أخذ عليه زعوج واضحك وأغنّي = والعب الماوه وادنّه وأسرّيه
وأساهره لين الاوايل بدنّي = اسهر وأساهر كل نجمٍ وأراعيه
لين النجوم اللي بدا ً أكهبنّي = والليل نحّا مابقي غير تاليه
وأسرح وأروح واقرع إقراع شنّي = شنّ ٍ يهاب ولاهب الوسم شاويه
وألاّ كما تقرع خلوجٍ تحنّي = غاد ٍ ولدها وأيّست من حراويه
إقفاي وإقبال ٍ خطاية لفنّي = وازاول المربع سبب حب راعيه
وابيع وأشري في ليال ٍ مظنّي = ليت الزمان اللي بقا مثل ماضيه
مير الليال الباقيات غدرنّي = وكم واحد ٍ مثلي تغرّه لياليه
لو الليال بغيبهن علمنّي = والله لاأكب الود مرّه وحاليه
قالوا علامك قلت رمح المطنّي = غرو ٍ زعجنيبه وراح وعطانيه
توافقن شفوف ظنّه وظنّي = عينه تراعيني وعيني تراعيه
ناس ٍ يحسبون الهوا بالتمني = لو مايعرفون الهوا الاّ بطاريه
اوّل عرابيل الهوا ضحك سنّي = وبين القلوب مناقش الهرج ينشيه
لين إن عشّاق الهوا يرجهنّي = حلو القدوم وسم ساعه بتاليه
يبقى بصندوق الحشا مستكنّي = هذي سلوم الود ياجاهل ٍ فيه
يابو محمد لاتبرّون منّي = تكفون ودّونيه ولا عطونيه
أبا الحقه لو هو بعيد المطنّي = والاّ يجي وعلاج شرّه حسانيه
وإليا نشدك مغيزل العين عنّي = قلّه يقول وعلّمه لين يوحيه
على الخطر قلّه يجي يمتكني = أسباب مرواحه مجيّه يداويه
وإن كان عيـّا قال ماهوب منّي = أقسم بحق اللي يميته ويحييه
أنّه بضربة رمحه المستسني = زرقة سهم رمحه عسا الله يجازيه
وإن سالكم عن رمحه اللي طعنّي = رمح النظر ماهوب رمح ٍ بأياديه
رمح الدجيما اللي إقتلبه قتلني = ماأحد ٍ دفع سوقه ولاّ أحد ٍ طرد فيه

ولدعساف 28-Jun-2010 02:22 PM

الله الله .. صح لسان شاعر عتيبه بن ثعلي والله يرحمه .. علم من أعلام الشعر شعبي !!

,,

نقل موفق .. ونطلب منك المزيد من قصائد بن ثعلي !!

ابن صنهوت 28-Jun-2010 11:24 PM

الله عليك المبدع ماينقل الا مبدع رحم الله عبدالمعين ولا هنت يا نجم

يوسف العازمي 29-Jun-2010 05:03 AM

الله يرحم الشاعر الكبيرعبدالمعين بن عقل الثعلي

لاهنت على نقلكـ


الساعة الآن »12:33 PM.

 Arabization iraq chooses life
Powered by vBulletin® Version 3.8.2
.Copyright ©2000 - 2024, Jelsoft Enterprises Ltd