سلام رديه وانا طرقي على.. وسق المطيه جبت ماي و مزهبي=واليا وصلت الباب انادي ياعرب .. واللي عقد روس الحبال يحلها
إما فرسناها على راس الفلا.. والا بطيب النفس هاتوا واجبي=باب النشب مايقفله غيرالشبب.. واللي عقد روس الحبال يحلها

يامرحبا من طيبها الهم نجلا .. بالطرقي الي مادرينا وش يبي=وبنك الذهب ياتي على حسب الطلب .. والي عقد روس الحبال يحلها
تستاهل الفنجال مع فذة حلا .. مس شنبك من شان انا امس شنبي=قدام عينك لايغطيها الهدب .. والي عقد روس الحبال يحلها

دام البقاء والدار ماعنه وكلا..ولايرحب عن هل الداراجنبي=تكفي عتيبه في الوجوب ليا وجب ..واللي عقد روس الحبال يحلها
لو يهبط الفوال في سوق الغلا..ينهار سوق دبي والا ابوظبي=يكيل في الجره جنيهات الذهب..واللي عقد روس الحبال يحلها

الدار ياورقان معطينك جلا..خل الضعافه منت بضعيف وغبي=النقد مايجهله شعار الادب .. والي عقد روس الحبال يحلها
يجوز هذي هقوتك مير البلا .. فالمنسدح مادري فالي دوب يحبي=كم تاجرن منا تجيه أم الركب ..؟ والي عقد روس الحبال يحلها

مايكشف الاسرار ياكود عملا..علم بها اللي قالها لك ياصبي=اليا قطعنا الراس ماعاش الذنب.. واللي عقد روس الحبال يحلها
اشعب بعد بطنه من الرزامتلا..لايحلم انه للعرب يصبح نبي=حتى لوانه ينقل السيف الحدب..واللي عقد روس الحبال يحلها