سلامي عليكم يا العطاوي سلامي=سلامن مزج بالكاد والعود كله
كلامي ذهب وانته عليك الكلامي=بغيت استعس الدار ماجبت زله

قطامي وارحّب بالعديم القطامي=هلا مرحبا ماهلّت المستهلّة
نظامي نظامك .. مار خلك نظامي=ودربٍ ينجّيك اقبضه لا تزلّه

همامي يدوم إلك البقا بالهمامي=عدد من سرى في الليل مع طيف خلّه
شمامي تبا تلتف عندي شمامي=طريقي يكيدك لا تهمقاه خله

مرامي .. رضاكم لن حصلّي مرامي=ولا كلّ من يبدي مرامه حصلّه
حرامي .. حلاله مكسبه من حرامي=انا لي طريقي وانت دربك تدلّه

حسامي كسرله ياابن عمي حسامي=وانا اشــوف برضايه عليكم مذله
عصامي حراميّك حرامي عصامي=سرق منك تاج المرجله وستحلّه

عظامي .. صمايل فالأمور العظامي=تراها تحمّت لا يجي فيك خلّة
مقامي .. رفيعٍ عن رديّ المقامي=لكن لا تزيد الطين ياذيب بلّة

سهامي محنّيها بسمن سهامي=سقطري ولا ينفع معه طب علّه
حمامي تجي من سم رمحي حمامي=وانا اشوف في صدرك لرمحي مشله

تهامي .. وانا ماابحث علوم التهامي=اعرفه يثور ابه البلا مافطن لّه
دوامي وصِل وانته ماعندك دوامي=يهالفاضي اللّي ماني بفاضي لّه

حزامي قهرله قوم هذا حزامي =تبا تعتذر يالله يجي من يحله
ختامي هذا قافن معك لي ختامي =وانا ارد سيفي ماعليكم بسله