تعال يا مثقف وفاهم وحريف = والدال قبل اسمك مسوي علامه
واللي بعد عنا يميّزك فالصيف = تقضيه في دارٍٍ ما يجلى غمامه
اما على باريس ولا على جنيف = بالمختصر عنا تروح بسلامه
مانته من اللي يحسبون التكاليف = وادنات حاجه منه يعطى غرامه
ولا فقيرٍ عيشته بالتناتيف = في وقت فيه المال ساس الكرامه
انته من ظروف الزمن والصوايف = واللي يغث المجتمع في كلامه
العام اعرفك كنت في دارنا ضيف = وانا الكفيل ومن عطاك الاقامه
واليوم كنّك عامل ٍ لك معاريف = يومٍ وجهك يبتسم ببتسامه
قال المواطن منعم وعايش بريف = من الشمال الين ساحل تهامه
تبغى الحقيقه ماعلينا تخاليف = يانعنبو من يلحقه بالملامه
مادام له راتب وخمسة مظاريف = وياخذ بدل حتى بلحظة منامه
هو مادرى انا ماحصلنا لتوظيف = وان الشهايد في يدينا ندامه
في كل صبح نوقف لساحل السيف = يالله لعل الموج يلقي طعامه
هو مادرى انا من بنوك التساليف = نبني بيوت ونكتشخ بالعمامه
يعني جسم لكن كله غضاريف = ولا فيه جسمٍ ياقف بلا عظامه
نص الشهر نعجز لا نقضى المصاريف = هو منهو اللي يستحق اتهامه؟؟
حنا نقول ان الغلا السر يا منيف !! = ولا الخلل في بندنا مع نظامه !!
وقف ليا من شفت لوحات توقيف = والخط الاحمر لا تجي في محامه
ياموطني حبك ماهو بالسواليف = حب المولع في بداية غرامه
ياموطني تكرم عن اللي على الزيف = يشعب بعير ولا يحقق مرامه
لكن انا عن من بلته الصواديف = انقل هموم المجتمع يا حمامه

المشاركة الأصلية كتبت بواسطة ولدعساف (المشاركة 1047925) .. الله الله .. صح لسانك يالشطيطي .. قصيده جزله من شاعر جزل لآهنت .. إحترامي وودي لك :) .. ,,,