وألا يا كثر هرجك يالثبيتي كل ليل ويوم = لكن الفعل ما من فعل والاوضاع خربانه
علامك يالثبيتي يا حلالي ما تدك القوم = تنادي في بني عمك وتمحاهم من الخانه

مدام ان الحزام اللي نشدبه الظهر مقسوووم = تبا تسريبها ذالحين دامت نيتك شانه
علاك بشاطي الراحه وتلقى الشيخ ابن مكتوم = عديم الراي ضيع فالشدايد رزق ورعانه

تبرى يالثبيتي مير ألومك وأكثر من اللوم = عشانك رئيس الشله وراع الخيل وعنانه
مدامت هذي علومك انا بنشدك كم السوم= أظن الختم يارجال ودك ترخص أثمانه

انا ماقلك اني من مقادير الخطا معصوووم = وابو زيد المسمى كبوته من كبوة حصانه
ليا شفت العصار اللي مقاديمه على ام الدوم = تلفت ولقيت القوم فالاوهام غرقانه

لكن الفارس المغوار في لحظه تراه يقوم = يهز الخصم والنصر العظيم يفك بيبانه
لكن أنتم 8 عقود بين اكل وشراب ونوم = وبنوك سويسرا مما يجيها حيل مليانه

تعديها على وجيه السباع وتاخذ المقسوم = على الوسطى من السبابه اثبت وقفل الخانه
تحسبن الدعاوي ياصخيف الجنب حب خشوم = وراس ٍ مانت قده حبه ودنق على شانه

وألا يا طير ياللي فالخضيراء تكثر من الحوم = ياليت الحضرمي يا أصحابنا قد صك دكانه
الا وا وجد حالي فوق ابن ماعز واخوه التوم = مع ابن حميد ليته يالثبيتي ترجع أزمانه