يالله يامعبود ياحي قيوم=ياللي على تبديل الاكوان قاوي
تفرج لقلب(ن) به هواجيس وهموم=طاويه من هاجوس الايام طاوي
تغير الايام يوم(ن) بعد يوم=ولافيه يوم(ن) مثل يوم متساوي
والسر مابين المعاليق مكتوم=والجرح يلقا له طبيب(ن) مداوي
جني بنات الفكر مع لذة النوم=صحيت من نومي وانا له شفاوي
جبت القلم والبوك مغرم وملزوم=شعري غني وانا بشعري غناوي
طرى علي القوم ومواجه القوم=على ظهور مبعدات الغزاوي
قوم(ن) لهم طبع وتقاليد وسلوم=اكل عليها الدهر عشر المطاوي
ماعاد باقي غير تاريخ وعلوم=ورواية(ن) يروي بها كل راوي
يوم القبايل بين هازم ومهزوم=لي عزوت(ن) منها تهاب العزاوي
لاوسع الميدان لرماح وسهوم=ربعي عتيبه مخلفين الهقاوي
اليا اقبلوا ركابة الخيل حثلوم=اهووا عليهم مثل نجم(ن) سماوي
وان حطوا الميعاد في يوم معلوم=للخيل خياله وللموت هاوي
العمر له ساعات والاجل محتوم=والصبر عروانن قوي العراوي
دقلاتهم جمع(ن) مثل دولة الروم=بندق وسيف وضرب رمح(ن) قناوي
وهيبة رجال بينها الراي مبروم=يكفيك عنها مايقول الخلاوي
لطامة العايل وذباحة الكوم=بالعسر فايام الزمان القساوي
اول منازلهم ورى ضلع الاكموم=غربي حضن شرقي طوال النزاوي
والله جعل نجد(ن) من الغيث مرحوم=وعليه من مطلع ربيعه مهاوي
تشاوروا بالراي والامر محسوم=وكل(ن) على الطرقه معزم وناوي
شجعان مافيهم دراويش ورخوم=انحوا كما سيل(ن) مسيله نحاوي
مع دربهم طير السعد يدرج الحوم=يبا العشا قدامه الليل ضاوي
والله كتب والله قسم كل مقسوم=وصب البلاوي في نحور البلاوي
وراحت قبايل نجد شتان وقسوم=وصفا جنابه من جميع البداوي
وارست قواعد مجدنا دايم الدوم=فالديره اللي ماتجي بالمناوي
ماجت بحبة روس واكتاف وخشوم=الا بعد جاء للمشوف ثعاوي
في ظل شيخ(ن) عنده الراي محكوم=شيخ(ن) يصدر معضلات الدعاوي
تركي ليا عرض(ن) الارواح للسوم=حماي قطعان البدو والشواوي
ومصلط كما حر(ن) مع الجو صاروم=يهوي على خشمه هواية نداوي
وهذال اخو هملا ومقعد وسلوم=وابا العلا وايضا بخيت العطاوي
وابن محيا هيبته ترخي الزوم=يشهد على فعله كلام الفراوي
ومرزوق ابن وبصان فارس وشغموم=والهيضل الهيضل بعيد النعاوي
والشيخ ابن جامع له المجد مرسوم=والضيط جاله مزبن(ن) للجلاوي
ومحمد العبود هام العلا هوم=وقشعان من دون العشاير فداوي
وخزام لمعارك الخيل خازوم=شيخ(ن) لميدان المعارك هواوي
ومحسن بتاريخه عن المدح مخدوم=وزريب لا رد البرا مايراوي
واللي بقى مجده مخلد ومفهوم=وارجوا السموحه من جميع النحاوي
امدح بني عمي ولاني بمليوم=حبلي على هداج تيما رهاوي
وكل القبايل بينها الطيب مقسوم=يوم اعتلاج الخيل والذيب عاوي
واليوم حنا شعب مكرم ومحشوم=في ظل سيف العدل واهل التساوي
آل السعود مناصرة كل مظلوم=درع الجزيره للشريعه لجاوي
واختامها عداد ماهل ديموم=صلوا على راع المقام النباوي