سووا لي الكيف و ارهوا لي من الدلّه=البن الاشقر يداوي الراس فنجاله
كيفٍ لنا نحرقه بالنار و نزله=و اليا انقطع لو من ورا صنعاء عنينا له
البارح الليل ما غمضت به كله=اراقب الصبح جالس و اتحرى له
ابعث شريطٍ مضى و اطويه و افله=و اقول من يحفظ التاريخ لاجياله
قل للعراقي يفتش جعبته قل له=يلقى بها شئ ما يطري على باله
الهم و الغم و الطاعون و العله=حق لحاله كفايه حقه لحاله
من صفعةٍ ذاقها بانت بها الخله=يذكر هزيمة شهر شعبان و هلاله
قام الثعل يشتغل و يشاغل الشله=عزت و طارق و عد عدي و امثاله
يذبح و يصلخ يده حمراً و مبتله=شئٍ يخلي جبين الحر يندى له
يا ناس يا ويل من هذا زعيمٍ له=الشعب في وضع يؤسف له و يرثى له
شعبٍ شرب كره و اكل كره ..كرهٍ له=يتفل على صورته و يدوس تمثاله
تبت يدا ابو لهب تبٍ و دتبٍ له=و اللي معه بالحطب للقوم حماله
مقبل على طبخةٍ بالحيل تعمل له=يؤخذ بها الثار و الثوره تسوى له
حتى نسيبه ولد خاله تحيّل له=لغم له الهيلوكبتر وانشدوا خاله
الله ما يهمل الظالم ويمهل له=وان طال به عمرٍ اخس شوي واردى له
الحكم منهار والاحزاب منحله=ما اخس من حالةٍ فيها ولا حاله
من ردي حظه فأهل بيته يزّول له=صار الشجر قوم بعيونه يورّاله
من كثر ماهي تبيه يخاف من ظله=ومن يعلم الغيب لو عدي قتّاله!!
صدام انا بنشدك ويش انت حيٍ له؟؟!=مثلك بغبنه يموت وموته اشوى له
ما عاد تملك من السلطه خبر لله=خارج عن السيطره دولتك منزاله
جمّع عظامك سوات مجمع الجله=واحرق بها ما درى بغداد برجاله
الجيش يرذح تحت ذله من الذله=والشعب مسكين تضحك له وتغتاله
واذاعتك يا سويد الوجه منشله=ما عندك الا يا لاله يا لالا لا له
ايه بالله اسمعك زين اي بالله اي بالله=واليا تبين عدو بنّا وحنا له
ما تدري ان نعقد الحبل ونحله ذ؟!=بالعسر واليسر حلاله وفتاله
انعسف الصعب ثم يجيك مزينٍ دله=اديب ما يشتكي عرقوب جماله
ما نقتنع بالهجاد نصبّح الحله=مع الغطاليس رجليه وخياله
والدار ماهيب يا صدام محتله=ما استعمرت عقب حكم العود وعياله
واليوم عنها نسن السف ونسله=من شط واخطا الطريق نصلح احواله
والفهد تخسا عنه ما انت بقبيلٍ له=وطى برجله على غاربك بنعاله
ما انته بكفوه ولا شرواك كفوٍ له=الفهد يكرم عن المشبوه واشكاله
الفهد عز العرب والعُرب عزٍ له=وكم دولةٍ تستغيث المال من ماله
العادل العدل والاسلام شرعٍ له=ولبيعة المسلمين البيعه اولاله
والا انت مهزوم لا مذهب ولامله=مقطع اربع تطيح بكل محباله
مما مظلك تخدع الشعب وتظله=ومفسد ويدعى عليك وفهد يدعى له
وين انت ياللي له العذرا تكحل له=يقوم لعيونها وتشوم لافعاله
من طيب ابوها تبا وصفه حليٍ له=يقلط على شوبة البارود وظلاله
أبيك في لازمٍ قدك وقدٍ له=قمر عربسات يبرالك وتبراله
أمرٍ ضروري وخلك مستعدٍ له=ما انته مراسل تجي وتروح برساله
عندك مهمه وقلبك ما برد غله=جدول مسيرك تعرف العام مدهاله
اركب على اللي قنابلها من السله=بمكبرات الصور في الجو جواله
اخذ المدرج وتل بريكها تله=واخفق بها خفقة الكدري لمقياله
وانحر بها خاين النهرين وافطن له=لا ذكر بالخير في حله وترحاله
حدد مكانه بتلسكوب وانزل له=انزل رويدا رويدا واكبس الاله
حربيةٍ عاديه سوداً تسلل له=تسللت من جهة عمّان وجباله
جاته من الغرب عبر أجوا صديقٍ له=تحمل على متنها حزنه وسلاله
ترسم هدفها على الليزر وترسل له=اشارة الضبط والمضرب تهيا له
ما تحمله ترفعه مترين وتهّله=مع ذرة الشمس في قصره تحمّاله
تعطيه ضربه تدك القبو بالفله=والشر فاله وفال الله ولا فاله
من شدة الانفجار أقول بسم الله=تهتز الاهواز والبصره بزلزاله
في سبّع الارض تحفر له وتدفن له=من تحت الانقاض والانقاذ ما شاله
ياخذ سنه يلتهب قبوه كما المله=يذوب به صنقل الساعه وسلساله
ثم خل غيره يشوف ويعتبر خله=واللي يبي مثلها بالحال تثناله
الضعف ما حطه الطيّب سبيلٍ له = قد قيل من لا يعيل تجيه عيّاله