يالقرم قم حيث قوماتك يسرني= يوم أنت رجل(ن) من رجال المواجيبي
يامسندي قومتك تجلا الطفش عني = ترا الهواجيس تقبل بي وتقفيبي
هات العويدي وهات الهيل والبني = وقرب عليّ البغاديد المحاديبي
ونجر(ن) ليا ثولثه راعيه ثم دني = يقنب قنيب الموايق في المراقيبي
عسى هجوسي تروح وتبتعد عني = لياذقت فنجالها تطفي لواهيبي
حتى تزين العلوم ويطرب الفني = عود(ن) مضا له مع الدنيا تجاريبي
عود(ن) علومه على هجسي على ظني = مالفق الحكي تلفيق الأكاذيبي
بمجلس رجال(ن) إحشام(ن) مابه مشنّي = واحدهم اليا هرج ما جاله امعيبي
وعلومهم منوة اللي كان متمني = فيها النقا والرجولة والتعاجيبي
في ماجلس(ن) ماجلس به هن بن هني = خبل(ن) علومه تجي من دون ترتيبي
كنه موكل على هالنس والجني = وماهر وبيطار في شذب العراقيبي
هذا ومثله عسى الله يقلعه عني = مباه ون جيت يمه لايهليبي
ترا هذا منهجي ياناشدن عني = وابغى الذي مادرى من قبل يدريبي