يامقبرة داورد جاء في جنابك=ضيفاً على نهج الهدى والصوابي
ضيفاً عزيز وجاه يومه وجابك=جلاّل ابو عبيّه عزيز الجنابي
يا مقبره لو كان ما اسمع جوابك=اوصيك و اكرر عليك الجوابي
في وسط قبره لا تهايل ترابك=عفّي سباله لايجيها الترابي
عفّي سبال العود ساعة غدابك=ترى سباله مكتسيها الثوابي
يابوي والله مايعوّض غيابك=من بعد موتك من يجبر مصابي
قامت ضلوعي في بعضها تشابك=القلب من قو التنهات ذابي
يالعين هاتي وانثري كل مابك=من الدموع و لا يجيك العتابي
ابكي على اللي بالموده رعابك=حبه ملك كل الشعور و رعابي
ابكي ابوي و ساعدي بنجذابك=قلبن مع دموعك يجيه انجذابي
مرحوم ياللي ماتوانا ركابك=شيخٍ على العليا تحث الركابي
دايم على الطالات مفتوح بابك=ضارن على فعل العلوم العذابي
مرحوم ياللي ماخسر من رجابك=بعده حفظت الملزمات الوجابي
ياعون منهو فاللزوم انتخابك=في ساعتن منها النواظر تهابي
ضلعن تزبّن من زبنك ولجابك=تعدّي عنه كل الامور الصعابي
الطيب طبعك من بداية شبابك=متلبسه ملبوس بيض الثيابي
انت الكريم وكم كريم اقتدابك=و انت الوفي عند اختلاف الصحابي
وانت الشجيع وكم شجيع اعتزابك=وانت الحكيم ان عودت للخطابي
وحقٍّّ علينا مع طريقاً مشابك=نمشي عليه و لا نعوج الرقابي
وندعي لك المولى يخفف حسابك=في ساعتن فيها يطول الحسابي
وبيمناك يوم الحشر تاخذ كتابك=وفي جنة الفردوس حسن المآبي
ويالله يا معبود منشي سحابك=تسقي ثرى قبره بوبل السحابي
انت الذي رحمتك تسبق عذابك=عفوك ولطفك يا شديد العقابي

آآآآآآآآآآآآآمين يارب العااالمين ,,

الله يسمع منك ويرحم الميت ويجبر مصيبتنا ومصيبتك ,,

أسأل الله العظيم إنه يتجاوز عن أبوك ويغسله بالماء والثلج والبرد ,,

وأن ينقيه من الخطايا والذنوب كما ينقّى الثوب الأبيض من الدنس ,,

صح لساانك ,, قصيدة واافية ,, مليئة بالدعواات الصادقة ,,

//

إحترااامي ..!!!