إليا قفل صدري من الهمّ بالشّيش = ثمّ إحتكم بابه بقفل أبو تاجي
حتى أيش يا صدري ليا ضقت حتى أيش= ما فيه ضيق إلاّ بعده إنفراجي
أعزم على سجّ القدم و المطاريش= و ألقى سعت بالي و فلّة حجاجي
بخّوة مطاليق العيال المداغيش=مزاجهم ما يختلف عن مزاجي
ما قال واحدهم للآخر هذا ليش=و لجّو تقول إنّك بوسط الحراجي
عقّال ما فيهم خفاف و مرابيش=الراي الاول ما عليه إحتجاجي
ضيف الله و ربعه علي و المحينيش=و عواض معهم سلوتي وإبتهاجي
يفداهم اللي فالقرايا مكاميش=ما قطّ راحو مع وساع الفجاجي
اللي عزايمهم مثل عزم الاكديش=و عزم الونيت اللي يبي له بواجي
إليا غبشنا مع حتون المغابيش=ما فالطريق اللي نبيه إنعواجي
نلقى على درب المزون المراهيش =نبت النفل و الشيح وصفة علاجي
شذا عبيره ينعش الروح و تعيش = في جوّ غاية رغبتي و إحتياجي
فيه الزهر تلعبّه الريح ما نيش=البلّ فيها ما إرتعت و النعاجي
الجوّ صافي ما يجي فيه تشويش=طاح الربيع و طاح عنّا العجاجي
يا خاطري من عقب هذا تبا ويش ؟ = ما بعدها آناسه و فلّة حجاجي

المشاركة الأصلية كتبت بواسطة علي فلاح العضياني (المشاركة 1041798) إليا قفل صدري من الهمّ بالشّيش = ثمّ إحتكم بابه بقفل أبو تاجي