قال المقاطي من علومن مفصله=حتى قليل المعرفه يكتسيبها
من راس من عاشر زمانه وجربه=حتى عرف شر الليالي وطيبها
ساير زمانك لو يحدك على اللظى=وطبايع القشران لا تقتديبها
واعرف ترى دنياك لو هي صفتلك=لابد ما ترد الكدر من قليبها
والنفس لو تبقى على الحرص والحذر=سهم المنايا لازم انه يصيبها
وامنع لسانك لن بدا الضحك والزرى=اصغر عيوب الناس لا تزدريبها
كم كلمتن ردت على من حكابها=وعيوب من يضحك بهم يبتليبها
وبعض الكلام ايعاف ويذل صاحبه=معايب الاجواد ما ينحكيبها
خلك بشانك والخلايق بشانها=مالك بها الناس ربي حسيبها
وكلن ولو هو شامخن صامل الهمم=عنده عيوبن خاطره مكتفيبها
والناس في تالي زماني تلونت=ما عاد نعرف خصمها من صحيبها
رافق عزيز الجار ستٌار خلته=طلق الحجاج وخطوته ما يهيبها
لو هو بشرق الارض ولا بغربها=اطيب لنفسك من رداوة قريبها
والخاين البواق لو من قرابتك=خله لصكات الدهر يلتهيبها
تجنبه حيث الردى من طبايعه=لا نافعن غيره ونفسه معيبها
وان كانو الاصحاب قولن بلا فعل=حزت نهار الجد وش ترتجيبها
واللي رضا للنفس ذل ومهونه=الله يخيب حاجتن يرتضيبها
ومن ينطلق في حاجته لو بها العنا=يصبر على اللطمات حتى يجيبها
دوس العنا والنار والشوك والخطر=حتى المنايا لا تحسب حسيبها
قد كتبت الاقدار باللوح والقلم=والنفس مكتوبن عليها نصيبها
وختامها اطيب صلاتن على النبي=محمد الي سيرته نهتديبها