كريم يابرقٍ سرى يرعش ارعاش = ينفعك يوم انك بعينك تشوفه
برقٍ بياضه فالسما ابيض من الشاش = هذاه وصفٍ مختصر من وصوفه
والوصف الآخر لابرق كنه فلاش = من كمرة مصور يسوي بروفه
ليله سرى ساريه والمنظر بلاش = خصٍ لاقام يجر مقدم قنوفه
صورة بديعة تدهش العاقل ادهاش = الله مسويها ومنه المروفه
منشي مزونٍ جالها وبل ورشاش = سحابةٍ غرى بالاسم معروفه
صوت الرعد فيها تقل صوت رشاش = الخايف اليا اوحاه يزداد خوفه
تآخذ ثلاث ايام يبرد بها الجاش = وتروي كبودٍ للطبيعة شغوفه
منوة هل الذود المفلي والادباش = عقب الدهر والوقت شانت ظروفه
بدوٍ على الميسور تحيا وتعتاش = حتى ايش لو انه لحقهم كلوفه
توسعوا فالبر عن ضيق الاحواش = والكل منهم راح يطرد شفوفه
مرة ورى عرعر ومرة ورى جاش = ومرة على طراف نجد وينوفه
من وين ماطاح المطر ساق الابواش = يتبع هواها والهبايب تلوفه
واليا لفاه من المطاريش طراش = قرب سكاكينه وعلّق خروفه
ومر الزهاب وجاب له زل وفراش = وادنى معاميله وغسّل كفوفه
وسوى لهم بريةٍ تنعش انعاش = وعدى فناجيله على اكبر ضيوفه
ودارت سواليفٍ لها الراس شواش = الها حلا والها مذاق وطروفه
وان كان فيهم شاعرٍ عملته كاش = غنى على لحن القصيد معزوفة
هاذي طراة الروح يالشيخ عماش = والعمر له مدة ولابه نكوفه
يازينها لاجيتهم وقت مغباش = قدام نور الصبح ينسخ حروفه
ابعد عن الصجة وعن طاش ماطاش = الفرقه اللي ماعلاها حسوفه
واحدهم اليا جاك مايرمش ارماش = يزري من النعمة يوزان كتوفه
واليا بغيته حزة الضيق ينحاش = واما السعة يزمر ويضرب دفوفه
واليا بحثته في علومه ليا ماش = ومن حين تقفي قام يشهر سيوفه
غشاش واللي يعتزي فيه غشاش = وعن خوته نفسي تراها عيوفه
مسليمة كاذب وخاين وبكاش = ماينتصدق لو يكثر حلوفه
والحر وكره مايجي فيه خفاش = والديك شكله يتضح من عروفه
راس الظبي معروش ماباقي عراش = ياللي تدّور بين بصره وكوفه
الساحلي وشلون يبعد عن الطاش = مثل الهفوفي مايخلي هفوفه
والموتر اللي لامشى يقرش اقراش = مايعجبك ممشاه والا وقوفه
دفه بدرب السيل والسيل قشاش = ليت ولعل إنه ينظف بلوفه
هذا وانا اللي من عنى الوقت منداش = ازريت لا اقاوم عناه وصدوفه
غنيت قيفاني وعاش الادب عاش = وعاش الاديب اللي فرى الوقت جوفه

مــســلــيـــمـــة كــــــــــــاذب وخــــــايــــــن وبــــــكـــــــاش ** مـــايـــنـــتـــصــــدق لــــــــــــــــو يـــــكـــــثــــــر حـــــلــــــوفــــــه

والــــحــــر وكــــــــره مــايـــجـــي فــــيــــه خــــفــــاش **والـــديــــك شــكــلـــه يــتــضـــح مــــــــن عــــروفــــه

ياسلام عليك ياكنق ,, كلام في الصميم ,, 100% ..!!!

غــنــيــت قـيـفــانــي وعــــــاش الادب عـــــــاش ** وعاش الاديب اللي فرى الوقت جوفه

عاااش عاااش عاااش عاااش ,,


******************** **************** ************* *****************

الله الله ,,

البرقااوي ,, والله ونعم الشاارب ,,

صح لسانك ,, ورقاا شانك ,,

هذا وانت مالك فالنظم ,, وشلون لوانك مهتم ؟؟؟؟

بيض الله وجهك ,, ولاتحرمنااا خواتها الله لايحرمنااك ..!!

والـمـوتـر الـلــي لامــشــى يــقــرش اقــــراش=مـــايــــعــــجــــبــــك مــــــمــــــشـــــــاه والا وقــــــــــوفــــــــــه
دفــــــه بـــــــدرب الــســيـــل والــســيـــل قـــشــــاش=لــــــيــــــت ولــــــعــــــل إنــــــــــــه يــــنــــظــــف بــــلــــوفــــه