يابنت انا من رووس قومٍ سلاطين=قومٍ لها بالوقت صولـه وجولـه
زحول الرجال تزايد الصاع صاعين=لاقال كلمه يحتمـي وجـه قولـه
ربعي اهل طالات شـم العرانيـن=كسابة النوماس عاجـه ولولـه
مانقبـل الزلـه ولانقبـل الديـن=حاضر بحاضر والايادي عجولـه
يشهد على ماقول منـي براهيـن=تراحيب بافعاله رجـال شهدولـه
ايه ابدوي من راس حتى الكراعين=قاطن بصحراء والمجاهيم حولـه
مارضى المذله كان بالذل ترضين=ارضى الممات ولا حيـاةٍ ذلولـه
اشب ناري والنجـر لـه ترانيـن=اضبط دلالـي ولا حيـاةٍ كسولـه
تابع لديـن الله ماتبـع شياطيـن=تابع لديـن الله وسنـة رسولـه
يدي على مخباي مارجي البخيلين=لو حدني وقتي وشانـت فعولـه
اكرم ضيوفي وارفع الراس مترين=وادعس ريالي دون وجه الجموله
راسي كما ترسي اصم الضلاعين=صم الجبال السود ماحـدٍ يزولـه
كلٍ وعقله يثمن الهـرج تثميـن=ومن ثبت المخراج ثبـت دخولـه
لابارك الله فـي خـوي الذليليـن=خبلٍ مع العربان يشعـب ذلولـه
لارافعٍ قدره مـع اللـي رفيعيـن=صورة رجالٍ ماتعـرف الرجولـه
خسارةٍ بالوقت بالعسـر والليـن=ماله طموح ونظرتـه لارجولـه
واليوم فكري عارف الزين والشين=كلٍ على ماقيـل يعـرف حلولـه
هذي طبوعي قلتها كـان توحيـن=يامـا كـذا ولابـلاشٍ نقـولـه
اقـول روحـي لاعليـه تعوديـن=مادام يدي من جهتـك مغسولـه
روحي وسوي ماقدرتـي تسويـن=باليـد ولا كـان رجلـك تطولـه
ماشدني شكله من الساق للعيـن=ولا هز شعره ولا فتنـي بزولـه