ياسلامي عل رجلن فعوله جليله= يذبح الحيل ويسرك نهار الطرادي
ينحر الموت ماهاب السيوف الصقيله= مايهاب الخطر ويدوس خد المعادي

مرحبا عد كيف فوقه الجنزبيله= من يميني يقدم للصبي المفادي
والله انك سمي الجد مافيك حيله= هات علمك وعده ياالعريف الريادي

البقا شد حيلك جاك سيل المخيله= قدحتك من زنادك واما انا من زنادي
ودي اهرج معك بااللين واحسن وسيله= وابذل الطيب معكم مثل طيب المهادي

كل رجال بذراعه وعقله دليله= والله اللي علاه الجد والاعتمادي
المعاتب مايفسد ود خل وخليله= وانت شيخ وعلومك كلبوها قوادي

الله انه يجمل من يريد الجميله= والله المطلع باسرار كل العبادي
القصيره قصيره والطويله طويله= كيف اومنك بشدادي وتكسر شدادي

والله اني على العليا وعز القبيله= محتزم بام خمس ودونها بالجهادي
جيتني باالشداد اللي عوج فيه ميله= قلت عدل شدادك قلتلي روح غادي

كل رجال فالميقاف نعرف حصيله= لاتحاول تغطي والخبر فالروادي
ياعميلن تردى يوم واجه عميله= يركض الخيل ويسل السيوف الحدادي

شفت نار البدو وصلت لخشم الفتيله= طامعين البدو في جل مالي وزادي
اعترض في سبيلي كيف اخلي سبيله= وانت تدري بها لكن رحت متحادي

كان هديت وضعك ماقربت الفشيله= وانت رجال فالميقاف رجلن قيادي
اثرك الاسود الله لابدن فالدبيله= كل ماجاك ساري راح ليله هجادي

انشبونا مخلطت المرق بالعبيله= كيف قلبي يحب اللي عثا في ودادي
دون حلقي يديه مانخيت الحليله= العدا مالها عندي يكود العتادي