أنا بدوي ورغبتي في المواشي=عوص النضا وأربي العنز والشاه
وأشد وأنزل في دماث الدشاشي=وأشوف بالدربيل مرتع رعاياه
ومنها نزلت بفلةٍ وأبتلاشي=لا عاد منزلها ولا عاد ملفاه
وضاقت بي الدنيا وكثر النقاشي=وأشكي على ربٍ خلقنا وعبدناه
يا ناس خلوني مع الدرب ماشي=وأنظر بعيني مازما من حجاياه
ممشاي في جوٍ سقاه الرشاشي=برقه من القبلة تضاحك ثناياه
في خبةٍ فيها بسطت الفراشي=وشبيت ضوي والمعاميل مركاه
جبرٍ حطبها ما نجيبه قشاشي=والمي من غرّ السحايب رويناه
والجيب واقف راكبينه بلاشي=متخيرينه بالدنانير مشراه
يا طوي متاريس الوعر والهلاشي=ويسبق خفيف الريش لا زاد ممشاه
لونه بياض وخالطه بالرقاشي=جابه جميل وطمغته في محياه
والله ما غبط الملوك البواشي=لو حكمهم كل الأوادم تمناه
ورزقي على رزاق ضعفاء الخشاشي=يعطي الكثير ولا يمنّ بعطاياه
من أول لبسي جديد القماشي=واليوم لبسي من توالي بقاياه
عزي لمن دوبح عظامه هشاشي=وأوشك على بيره تنوح مطاياه
ما رافقه صلبه ولا له معاشي=وشاف العلوم القاصره من دناياه
بنصحك ياللي لك ضميرٍ وجاشي=أخذ النصيحة والحذاري حذاراه
أبعد عن الانذال خوف وتحاشي=لا يوقعونك في متاييه مضماه
لا تنخدع بأهل الوجيه الغشاشي=الكل منهم سلم الغدر يرقاه
النذل لو يضحك بوجه بشاشي=تراه جدرٍ منهار ساسه ومبناه
اللاش لاش ومنتجه راس لاشي=متسل سل من بين الاثنين مجناه
الضبي راسه ما يجيبه عراشي=خله يولي لو تقاربت مرماه
وأعنز على الطيب ولا أنته بنحاشي=يا قف معك بالحال والمال والجاه
خاله نشا بالطيب وأبوه ناشي=منهم وفيهم تفعل الطيب يمناه
يبرك جمل وإن قام ماهوب حاشي=حمله يشيله والعلايق تعلاه