مرقص دبي اللّي له القلب يرتاح=حتى سلاطين الجزيره تدلّه
لاصار ما في شربة البن مصلاح=غرشه من الويسكي بفنجال دلّه
وان كان يابن الذيب منته بمزاح=فانا عقدت الحبل وانته تحلّه
هذي بداية معرفتكم بجراح=إما شربت الكاس والا فخلّه

ماهوب صح الله لسانك ياجراح=يكفي من العلّه ثلاثين علّه
أنته وحكامك هل الكاس لا لاح=والا سلاطين الجزيره لا بلّه
حكام نجد اللّي ورا هضبة رماح=ضلالهم مثل الجبال المضلّه
صغيرهم يلعب بكم لعب مسباح=ويسد فاه أهل القلوب المغلّه
إن مد كف الطيب ماهوب شحاح=والى تعزوا دولةٍ مستقله
مانيب أزكيهم من جا ومن راح=يمكن يجي في صفة القوم خلّه
وان كان هرجك لي ولا انته بمزاح=يما حلا بعض الحكي في محلّه
ما نشرب إلا البن الأشقر إلى فاح=والا حليب بكار في وسط ملّه
رجل وطموحي من ورا النجم لا لاح=أكبر من اني أشتهر في المجله
يكفيني من المعرفه والتمداح=إني إلى ضاقت علي قلت : يالله
الوضع ذا مزعجي ولا نيب مرتاح=بروح واخلي لك دبي كلّه