السلام عليكم ورحمة الله وبركاته

مساكم الله بالخير ,,,, الشاعر هو لسان حال المجتمع قبل ان يكون لسان حال نفسه وهذي القصيدة تحكي عن
الموظفين المستخدمين الذين لم يتم تثبيتهم حتى الان رغم مؤهلاتهم العلمية وخدماتهم وانا أحد هؤلاء الموظفين
رسالة اتمنى ان تصل إلى من يهمه الأمر

هي لكم وبين ايديكم


صلوا على النبي

يامرحبا واهلين يالله حيه=باللي لفاني حزة العصريه
الله يبارك ساعة ٍ جتنيبك=ياراعي الأوزان والقافيه
نفرح بمثلك لا لفانا مسير=ياضيفنا اللي ماش ضيف ٍ زيه
اقلط تربع سم ذا فنجالك=تستاهله من دلة ٍ بريه
يالهاجس اللي كل ماناديتك=جيت وهلا يامرحبا بالجيه
اليوم ذا وقتك وذا ميقافك=ابرسلك بمهمتن سريه
عبر الفضا عاجل وعاجل جداً=بسطرك في داخل البرقيه
مضمونها ياسيدي عبدالله=يابو الكرم والطيب والجاهيه
بشكي عليك الحال واشرح وضعي=دامي مواطن وأحمل الجنسيه
انا موظف رتبتي مستخدم=اربع سنين وحالتي منسيه
شهادتي ومؤهلاتي ثانوي=واخذت معها الرخصه الدوليه
لاجيت ادور ترقيه قالولي=يا للأسف ماعندنا مو ليه
لو إنها عندك فداك وتسلم=لكن بلانا البنيه التحتيه
لاجيت أشبه راتبي فالدوله=ماكنه ألا راتب الجاويه
متزوج ومستاجر ٍ لي شقه=وسيارتي وأقساطها شهريه
وإليا لفاني ضيف لو هو مره=قطعت قسط الموتر الملويه
وجتني تويوتا تشتكي وإطّالب=وحطت جميع اللوم كله فيه
ماغير دون وجيهنا وإلحانا=ناخذ حقوق الناس بالعاريه
هذي ترى أوضاعي وهذا حالي=ماباقي ألا أكتبها مرثيه
مبغى عماره لا ولا ابغى فله=ولا ودي بهذي ولا هذيه
تكفى يابو متعب ومثلك يدري=عن حالنا وأوضاعنا الماليه
تكفى وتكفى في زمنا هذا=إتهز من فالكوره الأرضيه
ادخل علاك بجاه رب العزه=تنظر لحالي نظرة الحنيه