الهيـــــــــــــلا *** منتدى قبيلة عتيبة - وصف الخيل والمرجله للقسامي

بسم الله والحمد لله والصلاة والسلام على رسول الله وبعد

السلام عليكم ورحمة الله وبركاته

اخواني أعضاء هالمنتدى الراقي عامه و محبي الخيل خاصة اعرض على انضاركم

قصيدة في وصف الخيل و المرجلة بقلم ابو راكان

( عبد الملك عبيد القسامي . صاحب مربط السنجر للخيل العربية الاصيلة )

قم يا نديبي فوق صفراً من الخيل /// بنت الحصان اللي عريبٍ نسـبـها

صفراً عليها من قنوف المخايـيـل /// مثل البرد طش الحصى لا عـقـبـها

قبا عزومٍ عـجـها كنه الليل /// لا سمعت الصايح وشدة عصـبـها

يظـيـع راكـبـها مع الرأس والذيـل /// أصيلةٍ تعرف مدى اللي ركبها

طوالٍ وضايفها على الشكل النحيل /// متناسقٍ رمانها في ركـبـها

صلدا الحوافر قينها أربع مـقـافـيـل /// لا ما تعدى قبضة اللي حسـبـها

مزمومة الحارك على الجيد الطويل /// فج النحر ذراع قيس لـحـجـبـها

عريضة الجبهة و فمها مستطيل /// منتوقة العـيـنـيـن مضـفـي هدبها

وساع المناخر لـحـيـها حد الصقيل /// كن ألأذاني حربةٍ في نصـبـها

في مشـيـها في لعـبـها أم الجديل /// لا طبت الميدان و جلجل ذهـبـها

وإن ثولثت وإن روبعت للتراحيل /// ذيبٍ يهوذل صيدته مقتضـبـها

في سبقها في عديها وصفٍ و قيل /// شعر امرؤ ألقيس قدامي كـتـبـها

جلمود صخرٍ من على حطه السـيـل /// تلحق ولا يلحقها من هو طـلـبـها

بنت العبيه و الأبوي دمه كحيل /// متسلسـلـن مـن خيـل نجـدٍ حسـبـها

كاملة و مكمله وصفٍ وكيل /// الله حباها والرسول إحتسـبـها

اخترتها من بد كل المراسيل /// من صنع ربي والله اللي سكبها

سلم على خالد خوي المشاكيل /// نسل القروم اللي يشرف نسبها

أخوي لا من ردوا القال والقيل /// هو مسندي لنفس وصلت غضـبـها

لي مدةٍ يا خوي نومي تماليل /// همٍ برى حالي وروحي سلبها

وقتٍ به العاقل يشوف التهاويل /// يحتار فكرة ما درى وش سبـبـها

من يعمل الحسنات يلقى البهاذيل /// عكس الأمور تصير لو ما حســبها

يجيه من حسن النوايا مداخـيـل /// كلن تلحق نيته ثم شذبها

إما غشش فيض القلوب المغاليل /// وإلا ترحلها إبليس وشعبها

يالله دخيلك من ردات المحاصيل /// ومن شر خلقك والصدوف ونشبها

لا يا وجودي وين عدالة الميل /// وين الرجال اللي يقدر عتبها

اللي تشيل الهم والحمل الثقيل /// لابد من وقفةٍ نجني رطـبـها

المجتمع ما هوب للبس و ثعيل /// يلعب على كيفه وفرى قربها

المرجلة صعبة ولا هي تساهيل /// ولا كل من شره يباها كسـبـها

تبغى صبر تبغى لها عزمٍ وحيل /// عزيمــــــةٍ مـا أدنـاة شـيٍ قلبـــها

وفقة وحكمة ساس للحط و الشيل /// وسوق المطايا دامها في شببها

تبقى الأسود أسود لو مالها جيل /// والطيبة تبقى ويبقى سربها

حيث تم القاءها في أول مهرجان خيل في منطقة القصيم والذي اقامه مربط السنجر للخيل العربية الاصيلة .

وكذلك عرضت مع تقرير أمير منطقة القصيم ومدير عام مركز الملك عبد العزيز للخيل العربية الاصيلة بديراب

دمتم كما تحبون