سلام يحشم عن وجيه المفاليس = وينصا وليد اللي فعوله زهنه
وليد ابن خالد بفعله الا قيس = يطم ضلعان السما عانقنــــــه
من لابة المطران حماية العيس = كم شيخ قوم فعولهم يضهدنه
وبعد السلام يزين فوق القراطيس =شكوا الهوى يصحابنا فوقهنه
وليد لا جا الليل جني هواجيس =تسهر عيوني والمسا مهجعنه
بسباب من يزها جديد الملابيس =وعيون نجل بلا كحل زيننــه
قفا مع اللي جاه علم العواسيس =عود يبا زين النضا يرتعنـــه
قفا وبانن الجروح المراميس =اللي ضلوع الجوف قد دمدمنه
واليوم يانسل القروم الاشاويس= انكان ماتفزع عيوني بكنــــــه

يامرحبا ترحيبة تطرد الهيس = وتخص راعي الطيب من غير منه
بالشاعر اللي حمس البال تحميس = بنات فكري بالشعر جاوبنه
تركي ولد عود علومه نواميس = محنكه بالطيب من صغر سنه
من روس قوم بالملاقا فواريس = اشجع رجل يوم اللقا خاب ظنه
تشكي من اللي يبس الحال تيبيس = واعزتي عن صاحبي عذبنه
حبن بناله في ضميرك تضاريس = يوم البيوت من السهر شجعنه
وانا وطاني ماوطا عنتر وقيس = من واحد عوج الضلوع اعشقنه
ابشر من اللي ماضرا بالمداسيس = ابشر بها كان الليال امهلنه
والله لادورها فدوك الهداريس = ولتعب قدم رجلي وخبرك عنه
وان جيت ابوها سالم ارخيله الكيس = وان كان ماكفته له حمل دنه
من الذهب والماس من ملك بلقيس = حتى تشوف اللي عيونك يبنه