إليا نشدنا واحدآ قال مشغول = من كثرة الأشغال ماهوب فاضي
ومضى علاه الحول والحول والحول = وهوه من الأشغال ماهوب فاضي
وأقول ياعقٌال ماهوب معقول = تشغلكم الدنيا بكثر المقاضي
العمر لو يطول لا بده يزول = أمرآ من الله ماعلاه إعتراضي
دنياك كم أفنت طحاطيح وزحول = مضى علاهم وقت والوقت ماضي
يوم أتذكر عام الأول لهم صول = زحول الرجال مطوعين الغلاضي
واليوم مانشوف منهم ولا زول = أقفت بهم سود الليال المواضي
ماباقيلهم غير تاريخ وفعول = عقب الشديد وعقب قطع الفياضي
ياللي تصول بدنيا الأحلام وتجول = دنياك تعطي للسواد البياضي
كم واحدآ تعطيه بالعرض والطول = نيران عزه فالطويلات قاضي
مرتاح لو إنه مع الناس مبدول = ماعاف نومه مثل غيره يحاضي
وكم واحدآ فعله مع الناس منقول = تخليه يمشي فوق حر الرماضي
يالعبد لا بدك على النعش محمول = العمر مع دورات الأيام قاضي
عليك بالطاعات والغيب مجهول = أحسب حسابك قبل تقض القواضي
قبل يجي يوم منه عقلك يهول = إما جنان الخلد وإلا لواضي
إما رميت بصالي النار مخذول = وإلا حضيض بجنة للحضاضي