يا راكب اللي من حديث الموديلات = فخامة التصميم شكلة ولونه
نادر من انواعه بكل احتمالات = [ فكس ار] كامل وصف للي يبونه
امجهزينه للطلب والمهمات = والا عن اسواق المدينه نصونه
يطوي جراهيد الدير والمسافات = ابشايت المولى . وفضله. وعونه
عليه شغمومً يبوج المتاهات =ليا من ولد اللاش كثرت شطونه
عوايده قطع الفرج والمخافات = وامر الولي ينفذ بكافه ونونه
من ديرة اصحاب الوفا والشكالات = عفيف.ماسط نجد. قرة عيونه
دارن حميناها بحد الرهيفات = بوقتٍ يشيب الراس من هول .كونه
يلفي على اللي يدركون الجمالات =ربع ٍ مسار الطيب ما يقطعونه
ربعٍ يفكون النشايب ليا جات = الطيب ورثه بينهم يا رثونه
في حال سمحين ٍ،وفي حال عيات = عدوهم منهم كثيره غبونه
وتاريخهم حافل بعدة بطولات = يوم الزمان اللي يكشر سنونه
شادو لهم صرحً حيوده منيفات = عالي حجاه وراسيات ٍ حصونه
اهل امهيوبه في السنين الصعيبات=هرج الرخاء وقت اللقاء يحتمونه
ربعي ذوي جدعان ستر العفيفات = حوض المنايا فالوغا يا ردونه
ريف الهشالا فالسنين المخيفات = الضيف بسلوم العرب يكرمونه
واخص منعوتٍ سلومه شريفات = شبل الشبول اللي جويده منونه
زومان شيال الحمول الثقيلات = اهل المشالح فالدرك يزبونه
كساب قولة نعم في كل الاوقات = يوم الرخوم النعم ما يدركونه
مواقفه دايم سمان وجزيلات = ياصل وراء ضني ولاهوب دونه
مشعل ولد مطلق زبون الونيات = ربعه ليا ضاقت عليهم يجونه
يبدون ابو بندر بكل الخفيات = وان مـر ذكره كلهم يمدحونه
بينه وبين الجود ولف وعلاقات = العز راسه والحمايا متونه
[بديعته] تبقاء مقام اله وإثبات = واسمه يشرف عزوةٍ يقربونه
وفي مدح مثله يستوي نظم الابيات = وينساب معنى الشعر بأعذب فنونه
المدح ماله عنه مجنب وصدات = من ضن فيه بخير يلقا ضنونه
ابا امدحه لو مات من ضمن الاموات = مهوب حي، وربعته يدهلونه
وجعلي ما اقوله من عدم طيب الذات = شهمن ربوعه كلهم يا منونه
هيف السمان وريف صفرن كريمات = فنجالهن كيف وشرف يشربونه
يا الله يا ربي بديع السموات = يامن سحاب الخير تنشي مزونه
تبقيه حزه . بين ونس وسعادت = وبحمايتك عن ما يضره تصونه
وبجنتة الفردوس تجزاه لا مات = [[حيث ان بعدك عالم ٍ يشكرونه]]
على مواقيفٍ جسام وعضيمات = سجل بها مجده وعزز ركونه
حلو النبا ماهوب ماذي وشمات = ولا عمري اوحيت العرب يشمتونه
من دون قاصر في رجال المروات = اللي لهم ماقف ظفر يحتمونه
لكن ابو نواف سجل علامات = تبقا مأثر للعرب يعرفونه
أنشر له البيضاء بروس الطويلات = اهل الوفا منا الوفاء يا جدونه
وازف له با قات شكر وتحيات = الله يخون اللي رفيقه يخونه
مشعل اله معيه من العام وقفات = وعني بوصله مابطل تيلفونه
وجهني بخطوه وخطوه وخطوات = والعاين الله ثم مده وعونه
لين اصبحت عقب المشاكل مسرات = وارتاح قلبي عقب كثرة غبونه
مُدان اله بالطيب في كل الاوقات = الله يساعدني واخلص ديونه
جمايله معنا جداد وقديمات = من طيب نفس ، ومن ممان ٍ يمونه
تمت. ولعل القيل ، مافيه وزلات = بلسان صدق وكلكم تسمعونه

المشاركة الأصلية كتبت بواسطة بعيد المرامع اهل امهيوبه فـي السنيـن الصعيبـات هـرج الرخـاء وقــت اللـقـاء يحتمـونـه ربعـي ذوي جدعـان ستـر العفيـفـات حــوض المـنـايـا فـالـوغـا يـــا ردونـــه ريـف الهـشـالا فالسنـيـن المخيـفـات الضـيـف بـسـلـوم الـعــرب يكـرمـونـه يازين ..القول ..اللي على فعل واثبات... ونعم باهل مهيوبه ..خيالة الحرشا .. ونعم بذوي جدعان وذوي زياد وعتابه كاااافه .. وفي مشعل بن مطلق . ولله درك يابن جدعان .. وحضور افتقدناه من فتره طويله ...ولعل فرحه الحضوره وروعته .. .... تنسينا غيابك والعتب المترتب عليه :) وصح الله لسانك .. واعلى شانك وعودا حميدا .... ولاعاد تعاود الغياب :) بعيد المرامع