هذي منازل هل المجمول دراسي=لا جرةٍ نستدلبها ولا شوفه
ووضع المحبين بين الناس حساسي=راعي الهوا خطوته بالخوف محفوفه
أخاف لا جيت بنشد ناسه وناسي=أدرى على السد من واشي وملقوفه
أخاف من وأحد ٍ حاقد وبلاسي=نفسه على الغدر والتفريق مشغوفه
ماله مع أهل الوفا صوت ٍ ومجلاسي=دايم خلاف المقفي ينهش كتوفه
ولانيب عن حبها داله ولا ناسي=كبدي عليها بحد الشوق مشلوفه
أرجي مطيح الحيا وأزول عساسي=من شان ينقاد لي سلم ٍ على الحوفه
وأنشد عن النزل من ذا وذا ولا باسي=ما أحد ٍ من اللي بينشد مبديٍ خوفه
مافيه نكره ولا في القلب وسواسي=وقت الحيا دوجة العربان مالوفه
وأقابل اللي جديلة سترها الكاسي=لاوقفت كنها بالبشت ملفوفه
أبو جبين ٍ بداجي الليل مقباسي=مقباس شهب ٍ على الشيطان محذوفه
معزل الوسط بالشبرين ينقاسي=من شافها قال من المثناه منصوفه
جمالها فطر من بالعرش متواسي=لاهوب روج ٍ ولا الحجان منتوفه
من بعدها الحال كنه فيه نساسي=ونفسي عن الزاد والمشروب مصروفه