يازين حان اللقاء مليت مالإتصال= الحب يازين تدري وايش ماريّته
ماريته كل يوم وليل تطلب وصال= وماريته صاحبك تشفق علي جيّته
مرت ليالي طوال وحالنا لا يزال=وقلبك معّزم علي بخله وانانيّته
الوصل مثل المطرلا سقى سفوح الجبال= يحييي عروق لها مده وهي ميّته
والهجر مثل الشجاع اللي بساحة قتال = يقطع عروق الفؤاد بحد جنبيّته
بعدك يولع تحت عوج الضلوع اشتعال = يثّر علي صاحبك ويهز شخصيّته
اسرفت فيني كذا مغير روح وتعال =والحر ماهو بحرّ بدون حريّته
وانا دخيل العيون السود شفلي مجال = يامصّبح القلب بالحرمان ومبيّته
ذبحتني بالدلع والفلسفه والدلال =اللي تعدي حدوده ونجحت كيّته
صوتك رومنسي ودمك مثل دم الغزال= وحسين معروف باخلاقه وعفويّته
ما يعرف الا يمين يمين والا شمال= لا تستغله مادام انه على نيّته
حبي وحبك طفولي مثل حب العيال=عجزت يازين لا اعرف وايش نوعيّته
احيان مثل الدلي يصفق علي كل جال = واحيان غصن يظللنا تحت فيّته
رجعتني للهواء وانا بوقت اعتزال= قد جزت من حسنته واقلعت من سيّته
باعطيك فرصه تفكر في جواب السؤال =وكل يفكر حسب عرفه وعقليّته