قم يانديبي قبل لا يغّدر الليل=ود الكتاب ألي كتبتة بديّة
أركب على ألي لا مشى وأدرج الويل=صوتة يجدد ماضي الشوق فيّة
فكسار توة وارد فية تعديل=أجناح لكزس من ورى له مزيّة
ياسايقة روح وتربك تساهيل=أفطن ترى بريدة وراهم شويّة
نصب لبو محمد وعطة المراسيل=وأقلط وأخذ فنجال من شاذليّة
قصرة مقر وفية تلقى الرياجيل=روس العرب من كل صوب ونحية
عادل طويل ذراع نسل الحلاحيل=قرناس وقت فية سبع اللغيّه
يامسندي مليت من قال وقيل=ناس تسوق الناس يم الخطيّه
كلمة خطا تنساق قبل الفناجيل=والمشكلة مجلس رجال أجنبيّة
نسمع ونسمع من كلام دهاويل=ويشجع الجاهل على كل أذيّة
ميزت انا الدنيا وشفت المحاصيل=قلت وقل أنتاج راع الحميّه
راح الرجال ألى تسمى مشاكيل=يشكون وقت فية عين شقيّة
وانا شكيت من العنا والغرابيل=حظ الشقا ولا وحملة عليّه
أخاف من وضع الليال المقابيل=تنحي بي الدنيا على غير نيه
أصير مثل ألي حياته بهاذيل=يكن جرح فات ويقبل حليّه
مير الله ادرى يوم سقت التماثيل=هلت دموع العين والشين شيّه
هاجوس شعري ينقلب ويل في ويل=نفس الشقا تمسي وتصبح مليّه
ودي تحلل قول صاحبك تحليل=وتعطية راي فية حل القضيّه
رايك يحل الوضع وراي المهابيل=مرضاه لو تدفع به ألفين ميّه
وختامها ريح النفل خالطه هيل=ازكى كلام قيل وأزكى تحية
وصلوا على ألي بدل الشرك تهليل=محمد المعصوم من كل سيّه
أعداد من لبى جيل ورى جيل=يارب سترك يوم حشر البريّة

الله من قلب همومه تشاكيل=أمسي وتالي الليل بالكبدي كيّه
ياعين وش هذي سوات المهازيل=الدمع من عيني تعقب دميّه
لولاي أوسع خاطري بالمواويل=لقيتني مجنون في وسط فيّه
حي الكتاب ألي لفا دون تظليل=جابة زبون القرم جابة خويّه
فية المعاني والمعاني دواليل=خصة رفيع الشان من الخلق ليّه
الله على ألي لا مشت تطوي الميِل=طبلونها ميتين مع زود ميّه
ماتشتغل ياكود لاشافت سهيل=مسرا القشر في ليلة سرمديّه
أليا مشى كنه على كف جبريل=كنه يقود الجيش في الجاهليّه
خمسة عشر ونان وأربع درابيل=في مقدمه متساويات سويّه
لونه سوات الزبد في برطم شعيل=وألا جنوبه كنها المزهريّه
مساحتينه كنها حفة دريل=وأليا مسح كن القزازه خفيّه
مامسحوا في جنبها بالمناديل=ولا وقفوا يكفون وسط البليّه
رنج همر فكسار في هزموبيل=كن في بابه مع الجنب حيّه
سواقها مجنون مع جني هذيل=وأليا أعتزا سمعوه أهل الحويّه
من زود كيفه ياكل البن والهيل=من روس قومن بالملاقا سطيّه
عقب السوالف عقب هاك التعاليل=قال المماشي ماتفيد ضحويّه
هاك الردود وعجل الأمر تعجيل=أحذر ترى المضروف مثل الوصيّه
وأليا وصلته أبشر بذبحه الحيل=والكيف والضيفان والنار حيّه
لا تشتكي ياخوك من باقي الجيل=ضم الولد من ضمن هاك السريّه
هذا زمان فية لبس البناطيل=راحوا على الزينات مثل البنيّه
وألا الحشيمة فية قصر السراويل=بين لبعض الخلق تكرم ....!!
ضمه مع المبدول وسط المباديل=مثل البهم لا صار معها دعميّه
بعض العرب لا جاك في هرجه حليل=والله خسارة فية لو مات ديّه
لا شفت زوله مقبل كنه الفيل=وعقله سوات القطعه المعدنيّه
أما طلع مسطول ضمن المساطيل=تحرم علية المعرفه والهديّه
أقشر حلال القوم مع قشرة بخيل=في ذمتي ما يذبح البربريّه
مايعدله ياكود عداله الميل=راس عوج وعلته داخليّه
الله خلق ذله مع الناس تذليل=ذله يذله لو معه بندقيّه
هرجه قفا يمشيبها كل طربيل=لا هرجتن زانه ولا مقدريّه
يبا الثريا قالها ياخرا كحيل=ياجعل من يطلاه يطلا سميّه
أما يجيب العلم مع زود تمثيل=ولا يجيب السالفه بهلويّه
ياكثر ناس بالملاقا فحاحيل=وياكثر ناس بالملاقا رديّه
وبعض الرجال فحول لا دكت الخيل=له نيتن وحده ولك نص نيّه
مثل المطق هداج لا قابل السيل=ماعقبه رجال كبده ضميّه
قال المثل مع زين هاك التماثيل=ما للحمول ألا ظهور المطيّه
لا صار حملك مابغا الحط والشيل=الآدمي مخلوق نفسه بريّه
هذي ترا الدنيا وترا الصاع بالكيل=توفي وتعطي والجزا بالعطيّه
لا تامن الوديان تحت المخاييل=تصير مثل مزيد راعي ضريّه
قلبي هجوسة يامناحي ورى النيل=قلبي تعلق في حبال بدويّه
يالله عسى برقن مزونه هماليل=يمطر على جمران عقب العشيّه
تمشي به الوديان وهاك الجحافيل=وتربع به الخلفات عقب الضحيّه
تم الكلام ألي وزنته على قيل=ويالله عسى الغفران يوم المنيّه