قلت الليالي اللي بها الصدر يبرا=يبرا من العلّات والهم ينزاح
قال الليالي اللي بها الهم يطرا=ضيّم عميق الجوف من ماضين راح
سلطان حال من عنا الوقت قشرا=تدري عن العلّه ولاني بمرتاح
شد الرحال ودربك اللي به ادرا=نعطيه يوم الناس عن دربك تزاح
نمشي مع المنزال ليلن ومسرا=مسرا يفج الصدر والقلب يرتاح
ولا صار دربك مابه اليوم عثرا=والنور ضافي والقمر مثل مصباح
اخذ الرجال اللي لهم طيب يشرا=اللي بلا غثّه وله قلب صفّاح
حتى ولو دربك يصادف بعسرا=تلقا خوين ما يجي منه مشفاح
ابن الرجال اللي لهم فعل يدرا=ماحسّب الغالي ولو راح ما راح
شرواك يا اللي تسمع القول تقرا=يا صاحبن في الدرب كسّاب الارباح
الليل لامن راح يذكر بذكرا=كم ليل يجمعنا من الماضي وراح
يا نايف الايام ماهي بعسرا=معك الليالي تشرح القلب بشراح
درب الوفا نمشيه لو كان غدرا=ما نجهل الخوّه ولو زاح ما زاح

يا باين الايام بيضن وسمرا=لا تنغشش فالشمس مع فلق الاصباح
يومن على كيفك تجي تحت امرا=ويومن تمرمربك على كل جرّاح
اصبر على جرحك مع الوقت تبرا=وتلقا بصبرك للمشاكيل مفتاح
يا الله يا اللي تجبر الكسر جبرا=وقّف ولد عمي على الساق لا طاح
وتجعل لياليه المقابيل قمرا=والخير بيبانه على الدرب فتّاح
خيرات بيبانن لا جات زبرا=ترجع على المجنون عقله ليا ماح
وتارد على وادن جرا فيه خمرا=وتقطف من الاثمار توتن وتفاح
جيك كل اللي على البال يطرا=من دون ما تطلب عى الكيف مرتاح
والحور من قسمك شفاياه جمرا=تضحك ثناياها كما البرق لا لاح
تبري غليل اللي من الهم غمرا=وتجلا هموم اللي على القلب طفّاح
لو فالبحر تبصق بريقه تغمرا=عقب الملوحه صار عذبن بلا املاح
وانا اشهد إن الطيب له فيك عمرا=ورثك من الجدان ما جا بالارباح
يومن ورث الناس شلفن وبكرا=ورثك على دور المزامين ما راح

المشاركة الأصلية كتبت بواسطة الراي السديد (المشاركة 985595) صوت و صدى من اروع ما يكون صحت السنتكم جميع و الله لا يفرقكم

المشاركة الأصلية كتبت بواسطة أبن عتقان المغيري (المشاركة 985963) صح الله لسان الشعراء قصايد جزلة باين العتيبي مشكور على هذه الردية المتميزة ننتظر المزيد من أبداعكم