لاحت بروق الوسم يالله عسى خير = عان المزن هضب مناشيه قبله
وقامت تجينا بالعلوم التباشير = علم الحيا قلب العنا ينجذبله
قالو على نجد الخيال المزابير = سيله يعم الاوديه عقب وبله
ايام وتشوف الحياء والنوايير = وكلٍ على ذكر الحيا يدقع ابله
وتناحو اهل الصفر واهل المغاتير = والشعل يشعاها تقل طيش هبله
وراع المجايهم اندفع والمصاغير = يتلنهن واللي يجيه يحلبله
احد على هونه يسوق المضاهير = بدري مشى وان جا المعشا حسبله
واحد يحث بكارها والمعاشير = ماوده احد ياصل الريف قبله
يومين بين الاولي والمواخير = واللي سبق بالمشي زان الطربله
ثم شب ناره واقلطو له مسايير = هاك النبيل اللي ينومسك نبله
ودارت على جال الدلال المباهير = طرايف ماهو ثراويت خبله
وقلط لهم كبشً وراه المعاذير = النشمي اللي سبل الاجواد سبله
ذربٍ سليلٍ لرجال المناعير = ودك من الدوشان صبح تخطبله
وثنت بعدها كل ليله على خير = في روض امثال القشع نبت ربله
وركبت من يطرب لبعد المشواير = ابي عليه اللي على الطيب شبله
ماهوب طاير مير كنه يبي يطير = يازين ممشى له على ظهر عبله
وبعد وصل دار الحيا بالمذاكير = وشاف النزول اللي تحط الشببله
قمت اتنشد عن زبون المخاسير = وكلٍ يقول اقلط يروح الطلبله
قلت اسمحو لي مانبي زود تاخير = ياهل الوفا منصاي قعدان وابله
مسيار ماحنا لغيره مداوير = واقبال شيخٍ باذلين السببله
نبي السلام وسجةً بالمخاضير = وذودً يدله صاحبه لاندبله
حبه لهن حبه لشوف الخطاطير = ياقوم عنتر ويش حبه لعبله
ولاأخذت لي ايام في وقتها غير = وقتً لابعده بالوناسه وقبله
روضً خضر مافيه عج ومعاصير = ومجالسً تبعد عن الصدر دبله
عرف الرجال يزود الرجل تقدير = وهبة كريم وحظ من تنوهبله
يامعرفة قعدان ياخيرة الخير = وانا الذي في عرف مثله كسبله
رصيد مايوزن بصرف الدنانير = ابرك نهارً صار فيه السببله