يالله تحفظ الوطن وتحفـظ قاداتـه = ياربنا اللي ما نعبـد واحـدٍ غيـره
والحمـد والشكـر لله كـل حزاتـه = انجى محمد من المجـرم وتفجيـره
ربك جعل خطتـه تنهيـه بوفاتـه = والزرعه اللي زرعها جت بتدميـره
الله يسلط علـى الظالـم بحيلاتـه = من حيلته صـار تدميـره بتدبيـره
ومحمـد الله يحفظـه عنـد نياتـه = ما فتشه يحسب انه من هل الخيـره
والمجرم اللي نوالـه نيـةٍ جاتـه = قتله لنفسه ولا ضرت حـدٍ غيـره
الله كفى الناس من شـره وسياتـه = وصارت هزيمه لمن هذي تدابيـره
والأمن بالله ثم بأهل الدار وحماتـه = مليكنـا قايـد الجيـش بطوابيـره
وأخوانه اللي معه يقفـون وقفاتـه = سلطان والنائب الثاني على السيره
نايف بجهـده ومجهـوده وقواتـه = في وجه الإرهاب وأرهبهم بتفكيـره
في كل يـوم يفاجيهـم بضرباتـه = أفشل خططهم وصاروا منه في حيره
وهذا محمد نهج نهجـه وخطواتـه = الشبل ولد الأسد سيره على سيـره
ياشلة البغـي والإرهـاب ودعاتـه = بافسادكم بالوطن ما عندكـم غيـره
إما اعلنوا توبة المذنب وحسراتـه = ومن تاب في توبته للذنب تكفيـره
والا الخطر قدمكم تشـر علاماتـه = عقوبـة المعتـدي قتلـه وتعزيـره
وحنا مع ملوكنا بالـروح وفداتـه = ومن زعزع الأمن منفيٍ من الديـره