نعوذ بالرحمن من كل شيطان=ربِ مسيرنا وباسمه بدانا
ياربنا نطلبك رحمه وغفران=وترفع منازلنا وتهزم عدانا
وتزيدنا يارب توفيق وإيمان=ورضاك عن مانعمله مبتغانا
والشعر مرسول المشاعر والاذهان=لإسماع من يفهم بسحر البيانا
قاله لبيد بن ربيعه وحسان=اهل البلاغه في قديم الزمانا
والشعر ديوان العرب كل الازمان=واليا بغينا نكتبه ماعصانا
بحرٍ صعيب ولاقبل كل ربان=كم واحدٍ هاز العبور وتوانا
والبحر قاعه فيه لولو ومرجان=يالله عسى عنه البحر مايحدانا
وباسم اومرانا مرحبا عد مابان=نجمٍ بنوره يشتعل في سمانا
ترثة حباب اللي له المجد عنوان=القول مايوفيه مهما حكانا
له في الجزيره دور في وقت الاكوان=وابن رشيد بمنطقه ماخفانا
وزريب زيزوم السرب طير حوران=قال النزول لنجد قلنا مشانا
ويا كاتب التاريخ وقف على شان=ماتغفل الواقع وتخطي علانا
سجل على صفحتك الاولى بالألوان=فعلٍ لو انا نكتفيبه كفانا
المعجزه ماهي مصاويل فرسان=المعجزه رد البرا لقحطانا
قومٍ لهم في ذروة المجد مسكان=سادوا قرارة نجد حتى لفانا
ولو نحصي الافعال نحتاج ديوان=وديوان مايحصي فعول اومرانا
شوخٍ ليا هز النذر كل ديقان=قالوا لمأمور المباني بنانا
وحنا لهم ربعٍ على الطيب عوان=ما أحدٍ بدرب الطيب يلحق مدانا
جذعان حي الاسم لا قيل جذعان=ليا اعتزا الخصم العنيد اعتزانا
وان راحت الدنيا قديحه وصوان=ماهو حظيظ اللي يجي في نحانا
وان صعبت الدنيا ووجه الدهر شان=نصبر وننفق ماتحوشه يدانا
واليوم ندمح غلطة فلان وفلان=كله من اجل انا نحشّم لحانا
نعامل الغلطان باسلوب الاحسان=على القشر ماهي سريعه خطانا
وكل القبايل نعم من غير نقصان=الهم بفعل الطيب قسم ومكانا
في وقتنا الحاضر وفي ماضي كان=في كل مسعى يكسبون الرهانا
واليوم فالاسلام جيران واخوان=وللحاكم العادل نجدد ولانا
في حكم ابو متعب ونايف وسلطان=يفخر وطنا بالامن والامانا