يشوش الراس لامن قمت قدم الناس فالميعاد=ولدو يمي أهل العرف وأهل الشعر ورواته
يشوش الراس والأحساس في جوف الصدر يزداد=وتنتاب المشاعر نشوة النصر وملاذاته
يشوش الراس ويطير العماس وتصغي الاشهاد=على الشعر الجزل ويعاف راع الهزلة أبياته
وأنا شاعر ولي فالشعر كلمة يعجز النقاد=ينقص من جزالتها ولو ناطح بها ذاته
كتبت الشعر من صغري وجاله داخلي ميلاد=ولد رجلٍ كبير وتذهل العالم عباراته
حشمته عن هروجن تفرح الغاوين والحساد=ولاهموني الحساد والوقت وغوياته
ذخرته لليال اللي حشى ماهي ليال رقاد=ليا قاموا هل الكلمة وكلن شال راياته
مثل ذا الليل وليال الفرح لأهل القصيد اعياد=تهيضهم وتبعدهم عن الهم ومتاهاته
أحد يكتب عن الفرحة وأحد عن مجد ربعه ذاد=وأحد مد الوفاء لأهل الوفاء واستغنم اوقاته
وانا لي شهر كامل ما اتهنى بالهوى والزاد=اداري هاجسي وانخاه لايبخل بمداته
شهر كامل وأنا وياه نسهر ليلنا فجهاد=ألمه!! وأنثره!! وأرقد!! واقوم اجمّع شتاته
حشى ماقلت جيب البيرق اللي في يدين زياد=ولاحملت ظهره حملٍ اكبر من طموحاته
لو أني معتبر نفسي عليّه ماحدن قد زاد=لكن والشاهد الله ماطلبته فوق قدراته
ابا منه الجمالة دام راع اللازمة سداد= ومادام إن شيهان القنص يعرف بهداته
لجل ربعن تحرى مني الوقفة والاستعداد=امام اللي حضر في محفلن زادت مسراته
وأنا لامن وقفت بمحفل ربوعي هل الامجاد=أحس اني ملكت الكون صحراه ومجراته
اقف من دونهم شاعر وشعري لجلهم منقاد=واقوم بحملهم والوقت ماهمي معاناته
وارحب بأسمهم بالضيف وافرش للفخر سجاد=تمشى فوقه زحول الزمان احياه وامواته
ارحب وأفتخر والدلة الرسلان والبراد=سبقها العود الازرق للضيوف ومد نفحاته
هلا يامرحبا عداد ربان المزن واعداد=هماليل المطر!! والورد واجمل كل باقاته
هلا يامرحبا باللي نصونا في حفل شداد=هلا يامرحبا والضيف لو طالت مسافاته
يشرفنا حضوره والوفاء يبقى مع الاجواد=ومن زار البيوت العامرة تحشم زياراته
هلا في حفل قرمٍ شب ناره والزناد زناد=هلا بأسمه وأسم ربعي عصابة راسه عزاته
ذوي زراق مزبان الدخيل اللي طوى الابعاد=يبي قومن تفكة من صدوف الوقت وآهاته
ذوي زراق ساس المجد وإن جاء للفخر ميراد=ليا من قلت ربعي قبّل التاريخ صفحاته
ذوي زراق وإن جت للأصول وماضي الاجداد=من الهيلا عتيبة والعتيبي صان عاداته
نحت فعله على صم الجبال وعلم النشاد=مدى مجده !! وتاريخه !! ومرقاه !! وبطولاته
عتيبة مفخر التاريخ وأهل الخيل والأذواد =طحاطيح الرجال اللي بنوا للمجد هاماته
بدون قصور في كل القبايل والرجال أوتاد=مثبت فعلهم والذم فيهم يلزم سكاته
ونعم ونعم فيكم ياهل النخوة وكلن شاد=صروح المجد فدياره وأخذ قسمة وغاياته
تخاوينا سوا فالوقت وعيون الزمان حداد=تحت راية هل العوجا دروع الدار وحماته
هل العوجا سلاطين العرب لاعدو الاسياد=يكفينا الفخر فيهم مع الوقت ومسراته

ذوي زراق ســــاس الـمـجــد وإن جــــاء لـلـفـخـر مــيـــراد=لـــيــــا مــــــــن قــــلــــت ربــــعــــي قــــبّــــل الــتـــاريـــخ صــفــحــاتــه

صح لسانك


وعتلاشانك

يابراهيم

تحيتي وتقديري