قالو تغزل قلت وقت الغزل فات = الشيب بان وكل سن له احكام
للسن حكم وكل شي بحزات = وانا عن طروق الهوى منكف العام
حسبي عليهم جددوا فيني آهات = وقت الصبا راحت وهي كنها احلام
مادام نبش الجرح وازداد كدمات = وتجددت عندي اصابات والام
ابتغزل في جميل الجميلات = اللي سلب عقلي وخلاني احطام
بنت وهبها الله حسن وخيرات = زين وضعه الله ماهوب رسام
فيها حنان ودفء وايضا مسرات = وروايح تنعش كسيرين العظام
ياجاهل بالبنت في كل مافات = اعطيك عنها نبذه بروس الاقلام
هي مسقط للراس والراس مامات = هي منيتي هي سلوتي ماهي اوهام
تأريخها ناصع بعرض السجلات = منبع رجال العلم ورجال الاعلام
ديرة قروم مروظين الصعيبات = من جالهم مظيوم ماعاد ينظام
ربعي هل الزلفي رجال السجيات = لاحل طاريهم يقال سبعة انعام
مكارم الاخلاق طبع وعادات = اهل الشحم والهيل والبن وايدام
فيهم خصال طيبات حميدات = ماظن نحصيها على طول الايام
جعل السعد دايم وجعل المسرات = متواصله دوما على طول الاعوام
وصلاة ربي عد وبل المخيلات = على النبي الهاشمي خير الانام

المشاركة الأصلية كتبت بواسطة علي فلاح العضياني (المشاركة 966713) الله الله الله صح لسانك يا راع الزلفي ما شاء الله تبارك الله

المشاركة الأصلية كتبت بواسطة ابن صنهوت (المشاركة 966828) صح لسانك جزل

المشاركة الأصلية كتبت بواسطة عمر الدغيلبي (المشاركة 970141) يا سلام صح لسانك وسلمت طال عمرك نص جميل وننتظر المزيد ودّي :)