(ألف) أبا أبدأ والبداية سليمة = ولا من سايد جعل ربي يديمه
و أما المطر يقفاه خير وديمه = الله عطانا الخير و أفضل شريعة
(والباء) بنيت البيت والبيت معمور = و أنا أحمد الله ما شهدنا على الزور
واليا نوينا نحكم الفعل والشور = وأيامنا مرت علينا سريعة
(والتاء) تليت أفضل كتاب ومحفوظ = وبعض البشر في حفظه اليوم محظوظ
كتاب محفوظ من الزور والخوض = وإن كان ما طاعك زمانك تطيعه
(والثاء) ثبات بكل منزل و ديرة = حكم الملك زاهر وسيفه شطيرة
و اختار لك صديق دائم تشيره = واحذر صديقك في الليالي تبيعه
(والجيم) جمل كل من يجيك ويزورك = و أحذر تناسى فالمواقيف دورك
واليا ضغتك الدهر حكمت شورك = ولا تجي لحملٍ ما تستطيعة
(والحاء) حفظت الطيب في كل ميقاف = و أنشد عن الموضوع شيخ وعراف
واللي يصل للبيت يسعى و يطاف = حافظ على دينك ودينك وديعة
(والخاء) خفيف الدم ما أحدٍ درابه = يجعل ربي يكرمه في شبابه
والعلم من وداه يا رجل جابه = يا جعل ما يهواه شر وقطيعة
(والدال) درب الحرب تبغى شجاعة = وتصبر على الأيام سمعٍ وطاعة
لكن بعض الخلق مبلي براعه = وين السنافي و اقف وسد ريعة
(والذال) ذرا الرحمن وافي وكافي = ويعلم علوم الخلق بادي وخافي
و المد في الأيام والسلم وافي = و مبادئ الأخوان دائم رفيعة
(والراء )ركبت الصعب في بعض الأحوال = الله يكفينا كثيرات الأهوال
والبيرق المنصور يا رجل ما مال = سجل لنا التاريخ حرب الوديعة
(والزاء) زبنت بضلع في الأرض عالي = الله يحمينا عظيم الحلالي
ربك الكريم ولا يمل السؤالي = والرب يغفر والبشر ما تطيعه
(والسين) سمّيت وللرب صليت = حافظ عليها مثل عامود للبيت
في بحر وألا بر لِن رحت وأن جيت = ولا تضيق دروب تعرف وسيعة
و(الشين) شب النار للضيف دائم = حتى لو أنه جاك يا رجل صائم
والصقر يا رجال في الجو حائم = وترى الرحم يوصل وقطعه قطيعة
(والصاد) صبر وقلت يا صبر أيوب = وأما الحذر يا شيخ ما ردّ مكتوب
و مشاكل الأيام صوب ورى صوب = و أما الخطأ ما ينحسب له ذريعة
(و الضاد) ضبط القاف والشعر موزون = واللي شرفا الطيب ما هو بمغبون
والوقت هذا دون من دون في دون = ولا تخاوي ناس دائم صديعه
(والطاء) طبيب القلب عيا يبريه = يبدي لي الموضوع و أحيان يخطيه
واليا سألته قال ما فيه ما فيه = وما كل ديرة للمولع شبيعة
(والظاء) ظروف الوقت تعرف صعيبه = واللي يودي العلم واللي يجيبه
وترى الفتى بين أصبعينٍ قليبه = والله خلق بالأرض سنة وشيعة
(والعين) علمت وتعلمت عامين = وأنا اشكر الرحمن ما راح لي دين
وأيامنا تطوي بعد عام الألفين = ولا تماشي ناس تعرف خليعة
(والغين) غاب النجم معاد ينشاف = حتى لو توصف وتكثر له أوصاف
واليا صرفت من الذهب قيل صراف = مكتوب في الألواح ناس شجيعة
(والفاء) فداك اللآش في كل ميدان = تراه في أيامه مبهذل وتعبان
والفعل إله يا خوي حجه وبرهان = واللي يخط الأرض طير نقيعه
(والقاف) قلبك لا يضلي رهيف = تراه في الأيام لازم يعيف
واليا لقيت الصيف قرب وصيّف = اليا سكنت اسكن بدارٍ رفيعة
(والكاف) كم من ناس فالوقت جهال = وأنا امدح أهل الطيب ذربين الافعال
اليا لفاه الضيف دله وفنجال = واما الخبر ما هو بلزم يذيعه
(واللام) لا تمشي مع أنذال ونجاس = والوضع يا رجال والوقت حساس
والحرّ حرّ لو سمع صوت الأجراس = ولا تعرّض لليال الصقيعة
(والميم) من صلى صلاة تقرب = أفضل قرابه يقتربها من الرّب
ولسانه مجنب عن الشتم والسبّ = و لا يدور للرجال الوقيعة
(والنون) نوم الزين سمع وطاعة = ولا تسمع في علوم الإذاعة
عنده في الأيام طيب وقناعة = ياللي تحب الخير تلقى تبيعه
(والهاء) هوى ما ني برجال هاوي = واحد وواحد عارفٍ كم يساوي
واللي سرح لا بد ما جاك ضاوي = وقصص تجينا فالمجلة فضيعة
(والواو) ودّ الطيب للناس ترتاح = الطيب طيب النفس من طيب الأرواح
ما كل من طب البحر دوم سباح = ما خاب من كان النبي له شفيعة
(والياء) يطيب القلب لا زار شرواك = يذكرك بالخير ما عاد ينساك
يدعي لك الرحمن والرب يحماك = والحكمة من الرب جمع وجميعة