الهيـــــــــــــلا *** منتدى قبيلة عتيبة

-
-

عُذرا ً عن الإنقطاع .. قصيده جديده اتمنى ان ترقى لـ سمو اذواقكم

\
/

قالوا علامك .. ليه ضايق و مهموم = شكلك تحب .. والظاهر إنك تعاني !!
انا في كوم و راعي الهرج في كوم = الصدق مالله بالمحبة عطاني !!
ما اشغلت فكري فـ العذارى ولا يوم = والحمد لله يوم مالله بلاني !!
لا تقول من هرجتك ياخوك مصدوم = اللي على قلبي يقوله لساني !!
قلب بدوي ٍ لاعشق يبعد الحوم = غير المراجل ما عشق شي ثاني !!
بيته مع أهل الطيب ماهوب مهدوم = يوحي به القاصي وينصاه داني !!
لكنّ مافيني من الوقت مغموم = دنيا ٍ تضيق وضيّقت بالمحاني !!
صدري يفوح وضيقته دايم الدوم = والخاطر المكسور كسره يَبْـاني !!
حتى ايش لو همّي عن الناس مكتوم = من عاين عيوني انا اشهد قراني !!
اطيح ثم اقوم واطيح واقوم = والله يعين اللي بلش بالزماني !!
خاب الرجا ياخوك في ساير القوم = وين الرفيق اللي ليا ضقت جاني !!
صار الخوي في تالي الوقت معدوم = خلف ( المصالح ) يتعب الرجل عاني !!
لا صرت راعي مال وعلومك علوم = عانه تحت رجلك يدوّر مكاني !!
ولا صار مالك يا ابيض الوجه مقسوم = لا عاد تشره لا نساك ونساني !!
يارب لا تبلاني بـ خوّة رخووم = ضعاف الأنفس عاشقين الطماني !!
أبا الخوي قرم ٍ تسلل من قروم = لا ضاقت الدنيا وقف قال عاني !!
هاك الخوي اللي به الطيب مرسوم = اللي على درب المراجل تلاني !!
من روس قوم ٍ فعلها قبل معلووم = اهل الوفاء والطيب خطل اليماني
ما ضاقت الدنيا ولا الدرب مزحوم = لا صار جنبي طير شلوى كفاني !!
هو شف بالي لا اصبح الهم مركوم = يكفي ليا منه نشد وش بلاني !!
هذا سبب ضيقي وهمّي من اليوم = وين الرفيق اللي ليا ضقت جاني !!
والأ الهوى مالي ترى فيه ملزوم = من حبكم يا اهل الهوى ماعطاني !!
قلب بدوي ٍ لاعشق يبعد الحوم = غير المراجل ما عشق شي ثاني !!