سلام وألا مرحبا ياعيد مدري وش نقول = أنته وأنا فالحله اللي جودنا من جودها !!
من بعد عسيت المطر عطنا ممرات السيول = حنا بدو نطرب من علوم الحيا ونرودها !!

لابالله الا مرحبا والدار مليانه نزول = تغيب والا ماتغيب! الناس تحمى حدودها!!
يسدّكم وادي عصيل اليا ولاه الوسم حول = من مزنةٍ براقها يسبق رزيم رعودها!!

تبقا ونبقا والأصاله عند أهلها ماتزول = تقول وألا ماتقول الناس ذادت ذودها !!
أنته بشيرٍ بالمطر لكن ماجبت الأصول = وألا دياري ماجهلت جبالها ولهودها !!

اللي ثنا وقت الطلب واللي رمى انصاف الحلول = والمملكه من دونها قواتها وجنودها!!
على كلامك يالعصيمي حضّر شهودٍ عدول = لاتنقل الهرجه وتدخل نقصها في زودها!!

أليا مترت العرض عرض احسب حساب الطول طول = المملكه فأهل الضما والجوع شفت جهودها !!
عندي رجل عراف عقل وقول ماهو ب/ مهبول = حاكم يشد خطامها وأنت لزمت عضودها !!