اليوم هذا عندنا مثل العياد=أغلى الجوايز كلها جينا بها
نخبة سليل المجد عنوان الجهاد=اللي على التوحيد شد أطنابها
اللي بناها صرح وحدة واتحاد=وأحيا بها اللي ما بغى يحيى بها
عبد العزيز مطوع الروس الشداد=يا الله عسى جنة عدن يجزى بها
والجايزة جينا بها علم وكاد=الله يبيض وجه قرم جابها
فنجال بن سلطان جعله في المراد=اللي فعوله للعلا نرقى بها
قرمٍ ليا جت للتحدي والعناد=يارد عليها مايحسب حسابها
دايم على الله ثم عليه الاعتماد=لا منها صعبت على طلابها
معه البكار اللي لها في كل ماد= فعلٍ يشرف روسها وأصحابها
وضحٍ قليلٍ شكلهنه في البلاد=لا طبت الميدان كل هابها
سنامها فاهق وغاربها سناد=منتلةٍ مثل الشطان أرقابها
رثمٍ مهادلها مخالطها سواد=كنك تذر الكحل بين أهدابها
والإذن كن يحك بأسفلها قراد=خرعاً قصيرة قصرها ما عابها
والجنب سبع أشبار بالشبر الوكاد=قفزاً قصيرة عيز ما يحكى بها
سبحان من بالزين صورها وأجاد=ما به من العذروب ما يلقى بها
ليا أقبلت شدت لها أنظار العباد=وإن درهمت يا ما حلا ضبضابها
فيها ملامح من ذعاذيع البراد=تفتح لها كل الصدور أبوابها
ليا مشت في الروض في دل وركاد=الأرض منها ما يطير ترابها
ممشى هنوف قلبها غاد رماد=عنقا تبى تلفت نظر خطابها
وإن جاء نهار العرض جاء فيها عناد=النار لوهي قدمها تاطا بها
تدجر كما تدجر معيلة الطراد=ما ترجع المصغر على تلابها
تدحم بقوة جنب وعيون حداد=مثل السباع اللي تحد أنيابها
اتطلع أهل الرشد عن طور الرشاد=من مر طوح غترته وأومى بها
يشوش منها العود واللي في المهاد=من زين عرضتها وزين آدابها
البل سنام المجد ركن الاقتصاد=الله يبيض وجه من يشقى بها
كم واحدٍ منها تمرجل واستفاد=ما خاب شاريها ولا جلابها
والمال مهما زاد تاليه النفاد=من لابرز دنياه وش يبغى بها
المرجلة تبغى لها رجلٍ سداد=ما كل رجالٍ يشد نصابها
والعمر مثل الزرع قافيه الحصاد=والطيبة من حظ من يسعى بها
عساك يافنجال دايم في ازدياد=الطايلة عادتك وأنت أولى بها