أنا البارحه سهران لين الصياح أنباح = وأعد النجوم الساريه في مساريها
وأسولف على نفسي وأغني مع المسباح= مشاعر شعور(ن) صادقه يوم أغنيها
هجوسي كماطيرن يلوح له الملاواح= وأنا اللي على جزلات الأمثال داعيها
وأبشكي لبو محمد وبشكي لبو فلاح = رجالن تقدر خوة اللي يخاويها
وأخص الاديب اللي بحر الشعر سباح= أبومحمد اللي عارفن في قوافيها
أنا كيف أبسلا من هموم الهوى وأرتاح = وأنا اللي خيالي كل ليله يطريها
أسرني بحبه وأمتلكني بدون أسلاح = عسى الله يكافي من سواين أيسويها
وأنا لو أبا صفها ترى زينها فضاح = قمر خمس زايد عشر والنور غاشيها
وشعرن سوات الليل فوق الردايف طاح = عن البرد ولاهوب السمايم يذريها
وله ضحكتن تشبه لبرق الحياء لا لاح =وأنا أقول براق الحياء بين أشافيها
آلا واعذاب المغرم اللي يصيح أصياح =ويجر الونين وعبرت البعد يخفيها
آلا واعذابي دونها القفل والمفتاح= وبني عمها اللي ساكنين (ن)حوليها
حدوني عسى يحداهم المجرم السفاح =حدوني وأنا اللي ياعرب مغرمن فيها
ألا يازهور الورد ياعطرها الفواح =ألا ياهبوب الريح لزين وديها
وألا يانجومن فالسماء نورها وضاح = أبه نجمة(ن) عن باقي النجم نغليها
ياما حلا بعد العصر حزت المرواح = على اللي بعيدات المسافات يطويها
ليامن مسك درب الرياض وطريق أرماح=وتعدى طويق وديرة الزين ناصيها
ترى ديرته في نجد غرب(ن) عن السرداح = ديارن عسى وبل المخاييل تسقيها
أقوله وأنا اللي عارفن ردها ياصاح=أعرف العلوم المقبله من مقافيها
ولكن شئ (ن) في ضميري عليكم باح = الأسرار للي مثلكم مانخفيها